٨٤٤٨۔۔۔ حضرت ابن عباس (رض) سے روایت ہے فرماتے ہیں : حضرت ابوبکر منبررسول پر اس دن بیٹھے جس دن آپ کو خلیفہ رسول کا نام دیا گیا ، آپ نے اللہ تعالیٰ کی حمد وثنا کی، نبی کریم پر درود بھیجا پھر اپنے دونوں ہاتھ بڑھائے اور پھر منبر کی اس جگہ پر رکھا جہاں نبی کریم (صلی اللہ علیہ وآلہ وسلم) تشریف رکھا کرتے تھے۔
پھر فرمایا : میں نے حبیب سے سنا اور آپ اس جگہ تشریف فرما تھے آپ اس آیت کی ” اے ایمان والو ! اپنی جانوں کی خبرلو، جب تم ہدایت پر ہو تو گمراہ شخص تمہارا کچھ نہیں بگاڑ سکتا “۔ تلاوت فرمانے کے بعد اس کی تفسیر کررہے تھے، آپ نے اس کی تفسیر ہمارے سامنے یہ بیان فرمائی : جس قوم میں کوئی برائی کی جائے اور ان میں کوئی قباحت کرکے فساد پھیلایا جائے ، اور لوگ اس برائی کو نہ روکیں اور نہ ہٹائیں تو اللہ تعالیٰ کو یہ حق پہنچتا ہے کہ وہ انھیں عذاب میں گرفتار کرلے، پھر ان کی دعا قبول نہ کرے، پھر آپ نے اپنی دونوں انگلیاں کانوں میں رکھیں اور فرمایا : اگر میں نے یہ بات (پیارے) حبیب سے نہ سنی ہو تو یہ دونوں کان بہرے ہوجائیں ۔ (ابن مردویہ)