٨٦٢١۔۔۔ محمد بن مسلمہ (رض) سے روایت ہے فرماتے ہیں ایک دن ہم رسول اللہ (صلی اللہ علیہ وآلہ وسلم) کے پاس تھے آپ حضرت حسان بن ثابت سے فرمایا : اے حسان ! جاہلیت کا کوئی قصیدہ مجھے سناؤ، کیونکہ اللہ تعالیٰ نے تم سے جاہلیت کے اشعار اور انھیں نقل کرنے کا گناہ ہٹادیا ہے، اور ایک روایت میں ہے سامنے جاہلیت کی وہ اشعار پیش کرو، جنہیں اللہ تعالیٰ نے ہمارے سے معاف کیا ہے، آپ نے الاعشی کا وہ قصیدہ پڑھا جس میں اس نے علقمہ بن علاثہ کی ہجو کی ہے۔
اے علقمہ تجھے عامر سے کوئی نسبت نہیں، ٹوٹے تانتوں والا اور تانت لگانے والا، جو بہت زیادہ ہجو پر مشتمل ہے پر جس میں علقمہ کی برائی بیان کی ہے، آپ (صلی اللہ علیہ وآلہ وسلم) نے فرمایا : حسان ! میری اس مجلس کے بعد پھر میرے سامنے یہ قصیدہ نہ پڑھنا،
اور دوسری روایت میں ہے آج کے بعد میرے سامنے اس طرح کا قصیدہ نہ پڑھنا۔
حضرت حسان عرض کرنے لگے : یارسول اللہ ! آپ مجھے ایسے شخص ( کی ہجو) سے روک رہے ہیں جو مشرک تھا اور قیصر کے پاس ٹھہرا تھا ؟ آپ (صلی اللہ علیہ وآلہ وسلم) نے فرمایا : حسان ! جو لوگوں کا زیادہ شکریہ ادا کرتا ہے وہ اللہ تعالیٰ کا بھی زیادہ زشکر گزار ہوتا ہے، قیصر نے ابوسفیان بن حرب سے میرے متعلق پوچھا : تو انھوں نے (جوابھی تک مسلمان نہیں ہوئے تھے) میرا مرتبہ گھٹانا چاہا، اور اس شخص سے پوچھا تو اس نے اچھی بات کہی یوں نبی (صلی اللہ علیہ وآلہ وسلم) نے اس شخص کا اس بات پر شکریہ ادا کیا۔
اور ایک روایت میں ہے، آپ (صلی اللہ علیہ وآلہ وسلم) نے فرمایا : حسان ! قیصر کے پاس میرا تذکرہ ہوا تو وہاں ابوسفیان اور علقمہ بن علاثہ موجود تھے، ابوسفیان (جو اس وقت تک مسلمان نہیں ہوئے تھے) انھوں نے میرے متعلق کوئی نہ کوئی برائی نکالنے کی کوشش کی اور علقمہ نے اچھی بات کی، اور جو لوگوں کا شکریہ ادا نہیں کرتا وہ اللہ تعالیٰ کا بھی شکرگزار نہیں۔ (ابن عساکر)