٨٩٧٧۔۔۔ محمد بن سیرین سے روایت ہے کہ اصحاب کے تین گروہوں نے رسول اللہ (صلی اللہ علیہ وآلہ وسلم) کی ہجو کی، عمروبن العاص، عبداللہ بن الزبعری، ابوسفیان بن عبدالمطلب، تو مہاجرین نے کہا : یارسول اللہ ! آپ حضرت علی کو حکم کیوں نہیں دیتے کہ وہ ہماری طرف سے اس قوم کی ہجو کریں ؟ تو رسول اللہ (صلی اللہ علیہ وآلہ وسلم) نے فرمایا : علی یہاں نہیں ہیں، جب اس قوم نے اللہ تعالیٰ کے نبی کی مدد اپنے ہاتھوں اور اپنے ہتھیاروں سے کی ہے تو اپنی زبانوں سے اس کی مدد کرنے کے زیادہ حقدار ہیں۔
تو انصار نے کہا : حضور (صلی اللہ علیہ وآلہ وسلم) ہماری مراد لے رہے ہیں، تو وہ لوگ حسان بن ثابت کے پاس آئے اور ان سے یہ بات ذکر کی وہ چلتے ہوئے آئے اور رسول اللہ (صلی اللہ علیہ وآلہ وسلم) کے سامنے آکر کھڑے ہوگئے، اور عرض کرنے لگے یا رسول اللہ ! اس ذات کی قسم جس نے آپ کو حق دے کر بھیجا ہے مجھے یہ پسند نہیں کہ میرے لیے میری ایک بات کے بدلہ صنعاء سے بصری تک کا علاقہ ہو تو رسول اللہ (صلی اللہ علیہ وآلہ وسلم) نے فرمایا : تمہی اس کے اہل ہو، تو انھوں نے کہا : یارسول اللہ ! مجھے قریش کے نسب کا علم نہیں ، تو رسول اللہ (صلی اللہ علیہ وآلہ وسلم) نے حضرت ابوبکر (رض) سے فرمایا : اسے ان کا نسب بتاؤ ! اور ان کے عیوب اچھی طرح اسے بتاؤ، تو حسان بن ثابت ، عبداللہ بن رواحہ ، اور کعب بن مالک نے ان کی ہجو کی۔
ابن سیرین فرماتے ہیں مجھے بتایا گیا ہے کہ ایک دفعہ رسول اللہ (صلی اللہ علیہ وآلہ وسلم) اونٹنی پر سوار جارہے تھے اور اسے اپنی مہار کا پھندا لگا تو اس نے اپنا سر کجاوہ کے اگلے حصہ کے پاس رکھ دیا، تو آپ نے فرمایا : کعب کہاں ہے ؟ حضرت کعب نے کہا : میں یہاں یارسول اللہ ! آپ نے فرمایا اسے پکڑو ! اور ایک روایت میں ہے کہ آپ نے فرمایا : شعر سناؤتو انھوں نے کہا : ہم نے تہامہ اور خیبر سے ہر شک دور کردیا، پھر ہم نے تلواریں جمع کیں، ہم ان کا امتحان لیتے ہیں اگر وہ بول سکتی تو کہتی : اس کا کاٹ دوس یاثقیف ہیں، انھوں نے پورا قصیدہ پڑھا، تو رسول اللہ (صلی اللہ علیہ وآلہ وسلم) نے فرمایا : اس ذات کی قسم جس کے قبضہ قدرت میں محمد (صلی اللہ علیہ وآلہ وسلم) کی جان ہے یہ ان کے لیے نیز پھینکنے سے زیادہ سخت ہے، ابن سیرین نے کہا : مجھے اطلاع ملی ہے کہ قبیلہ دوس حضرت کعب کے اس قصیدہ کی وجہ سے مسلمان ہوگیا۔ (ابن جریر)