٩٠٢٥۔۔۔ (انس (رض)) عبداللہ بن یزید بن آدم سلمی دمشقی ، فرماتے ہیں : مجھ سے حضرت ابوالدرداء ، ابوامامہ باہلی، انس بن مالک نے روایت کیا۔ فرماتے ہیں : رسول اللہ (صلی اللہ علیہ وآلہ وسلم) باہر تشریف لائے اور ہم دین بحث کررہے تھے، نبی (صلی اللہ علیہ وآلہ وسلم) سخت غضبناک ہوئے، کہ ایسے غصہ کبھی نہ ہوئے تھے، پھر فرمایا : ٹھہروٹھہرو ! اے امت محمد (صلی اللہ علیہ وآلہ وسلم) اپنے اوپر جہنم کی آگ نہ بھڑکاؤ، پھر فرمایا : کیا تمہیں اس کا حکم دیا گیا ہے ؟ کیا تمہیں اس سے منع نہیں کیا گیا ؟ تم سے پہلے لوگ اسی کی وجہ سے ہلاک ہوئے۔
پھر فرمایا : جھگڑے کو چھوڑ دو کیونکہ اس میں بھلائی بہت کم ہے، اس کا فائدہ بہت تھوڑا ہے، یہ بھائیوں میں عداوت پیدا کرتا ہے، جھگڑے کے فتنہ سے انسان محفوظ نہیں رہ سکتا، اس کی حکمت سمجھ نہیں آتی، (بحث مباحث میں) جھگڑے کو ترک کردو کیونکہ اس سے شک پیدا ہوتا ہے اور عمل باطل ہوجاتا ہے، جھگڑے کو چھوڑدو، تمہارے لیے اتنا گناہ کافی ہے کہ تم ہمیشہ جھگڑتے رہو، جھگڑے کو ترک کردو، کیونکہ ایماندار جھگڑتا نہیں ، جھگڑے کو چھوڑ دو کیونکہ جھگڑنے کا خسارہ پورا ہوگیا، جھگڑا چھوڑ دو ، کیونکہ میں تین گھروں کا جنت میں ذمہ دار ہوں ، سب سے نچلے ، درمیان اور اوپر والے حصہ میں، اس شخص کے لیے جو باوجود سچے ہونے کے جھگڑا چھوڑدے۔
جھگڑا چھوڑدو کیونکہ میں قیامت کے روز جھگڑالو کی شفاعت نہیں کروں گا، جھگڑا چھوڑ دو ، کیونکہ مجھے میرے رب نے بہتوں کی عبادت اور شراب نوشی کے بعد سب سے پہلے جھگڑے سے روکا، جھگڑا چھوڑ دو کیونکہ شیطان اس بات سے تو ناامید ہوچکا ہے کہ اس کی عبادت کی جائے، البتہ وہ تمہیں بھڑکانے پر راضی ہوگیا ہے اور وہ اللہ تعالیٰ کے دین میں جھگڑنا ہے ، جھگڑا چھوڑ دو کیونکہ بنی اسرائیل میں اکہتر فرقے اور جماعتیں بنیں ، سب کے سب گمراہ ہیں مگر صرف سواداعظم ہدایت پر ہے لوگوں نے پوچھا یا رسول اللہ سواداعظم کیا ہے ؟ آپ نے فرمایا : جو اللہ تعالیٰ کے دین میں جھگڑتا نہیں اور جو اس راستہ کو اختیار کرلے جس پر میں اور میرے صحابہ ہیں اہل توحید میں سے کسی کی، کسی گناہ کی وجہ سے تکفیر نہ کرے۔
پھر فرمایا اسلام کی ابتداء انوکھی ہوئی اور وہ پھر انوکھا واجنبی ہو کر لوٹے گا، تو (دین پر عمل کی وجہ سے ) ناآشنا لوگوں کے لیے خوشخبری ہے لوگوں نے عرض کیا : یا رسول اللہ ناآشنا لوگ کون ہیں ؟ جو لوگوں کی (دین میں) خرابیوں کو درست کرتے اللہ تعالیٰ کے دین میں جھگڑتے نہیں اور اہل توحید میں سے کسی کی، کسی گناہ کی بنا پر ےتکفیر نہیں کرتے ۔ (الدیلمی، ابن عساکر وقال مسند احمد، عبداللہ بن یزید بن آدم احادیثہ موضوعہ وقال ابراھیم بن یعقوب السعدی : احادیثہ منکرہ اعوذ باللہ ان اذکر رسول اللہ (صلی اللہ علیہ وآلہ وسلم) فی حدیثہ) ۔