9223 ۔۔۔ فرمایا کہ ” کسی شخص نے آج تک کبھی بھی اپنے ہاتھ کی کمائی سے بہتر کھانا نہ کھایا ہوگا اور اللہ کے نبی حضرت داؤد (علیہ السلام) اپنی محنت کی کمائی کھاتے تھے۔ (مسند احمد، بخاری)
فائدہ :۔۔۔ ان روایات سے معلوم ہوا کہ حلال ذریعہ آمدنی اختیار کرنے اور پھر خوب محنت کر کے کمانا اتنا افضل اور پاکیزہ عمل ہے کہ انبیاء کرام علیہم الصلوٰۃ والسلام بھی اس سے پیچھے نہیں رہے مثلاً حضرت داؤد (علیہ السلام) جو اپنے ہاتھ سے زرہ بکتر بنایا کرتے تھے اور بیچا کرتے تھے کیونکہ ان کے ہاتھ میں لوہا نرم کردیا گیا تھا جیسا کہ قرآن کریم میں ہے کہ ” والنالہ الحدید “ (الایۃ) کہ ہم نے ان کے لیے لوہے کو نرم کردیا۔
اسی طرح خود جناب نبی کریم (صلی اللہ علیہ وآلہ وسلم) بھی ابتدائے زمانے میں چند قیراط پر بکریاں چرایا کرتے تھے اور اس کے بعد آپ (صلی اللہ علیہ وآلہ وسلم) نے تجارت بھی کی جیسا کہ معلوم ہے، تو جب انبیاء کرام اس معاملے میں کسی سے پیچھے نہیں رہے تو ہمیں بھی محنت سے جی نہیں چرانا چاہیے۔ (مترجم)