9287 ۔۔۔ فرمایا کہ ” رزق تلاش کرنے میں اعتدال سے کام لو “ کیونکہ جو کچھ بھی ملتا ہے وہ تقدیر میں پہلے سے ہی لکھا جاچکا ہے۔ (مستدرک حاکم ابن ماجہ طبرانی بروایت حضرت ابو حمید الساعدی (رض) )
فائدہ :۔۔۔ ان احادیث کا مضمون تقریباً یکساں ہے جس میں یہ بتایا گیا ہے کہ ہر انسان کی زندگی بھی مقرر ہے اور رزق بھی چنانچہ کوئی شخص اپنی زندگی کی مدت اور اپنا رزق مکمل کئے بغیر نہیں مرے گا، لہٰذا روزی کی تلاش میں بےاطمینانی، بےچینی اور جلد بازی کا مظاہرہ کرتے ہوئے حلال کے بجائے حرام ذریعہ نہیں اختیار کرلینا چاہیے کیونکہ اللہ تعالیٰ کے ہاں سے جو کچھ ملتا ہے وہ فرمان برداری کرنے سے ملتا ہے نافرمانی سے نہیں۔
اس سے یہ بھی معلوم ہوتا ہے کہ یہ بیان مسلمانوں کے لیے ہے تاکہ کافروں کے لئے، کیونکہ کافروں کے لیے تو دنیا ہی جنت اور انھیں جنت میں سب کچھ ملتا ہے جیسا کہ آپ (صلی اللہ علیہ وآلہ وسلم) نے فرمایا ” الدنیا سجن المومن وجنۃ الکافر “ یعنی دنیا مومن کے لیے قید خانہ اور کافر کے لیے جنت ہے کیونکہ وہ کسی اصولی اور ضابطے کا پابند نہیں اور شتر بےمہار بنا پھرتا ہے۔ (مترجم)