9428 ۔۔۔ فرمایا کہ ” لین دین کرنے والوں میں سے دونوں کو اختیار ہے جب تک سودے کی گفتگو ختم نہ ہوجائے، چنانچہ اگر دونوں نے سچ کہا اور بیان کردیا تو ان کی خریدو فروخت میں برکت ہوگی، اور اگر انھوں نے چھپایا اور جھوٹ بولا تو ان کی خریدو فروخت کی برکت ختم کردی جائے گی “۔ (مسند احمد، متفق علیہ بروایت حضرت حکیم بن حزام (رض) )
فائدہ :۔۔۔ اس روایت کے الفاظ یہ ہیں ” البیعان بالخیار مالم یتفرقا “ الخ، یہ مشہور اختلافی مقام ہے، یہاں شوافع اور احناف میں اختلاف ہے، حضرت شوافع مالم یتفرقا سے جسمانی علیحدگی مراد لیتے ہیں لہٰذا ان کے اعتبار سے ترجمہ اس طرح ہوگا کہ لین دین کرنے والوں کو اس وقت تک اختیار ہے جب تک وہ ایک دوسرے سے جدانہ ہوجائیں ۔
جبکہ احناف وہاں مالم یتفرقا سے مراد اقوال کی علیحدگی مراد لیتے ہیں یعنی لین دین کرنے والوں کو اس وقت تک اختیار ہے جب تک دونوں بھاؤ تاؤ کی گفتگو کو نظر انداز کرکے دیگر گفتگو میں مشغول نہ ہوجائیں، اس ترجمے میں حضرات احناف زاد اللہ سوادھم کے موقف کو ظاہر رکھا گیا، اختلاف کی تفصیلات اور قول راجح معلوم کرنے کے لیے کسی مشہور دارالافتاء سے رابطہ کیا جاسکتا ہے۔ (مترجم)