9518 ۔۔۔ فرمایا کہ ” سنو ! تمہارے اس زمانے کے بعد ایک ایسا زمانہ آنے والا ہے جو تنگی کا ہوگا (اس زمانے میں) خوشحال آدمی خرچ ہوجانے کے ڈر سے اپنے مال کو اس مضبوطی سے پکڑ کر رکھے گا جیسے دانتوں میں دبا رکھا ہو، حالانکہ اللہ تعالیٰ نے فرمایا کہ ” جو کچھ تم نے کسی چیز میں سے خرچ کیا وہی اس کا بدلہ دے گا “۔ (سورة سبا 39)
اور بدترین لوگوں کا سردار وہ ہوگا جو ہر مجبور سے خریدو فروخت کرے گا، سنو ! مجبوروں سے خریدو فروخت کرنا حرام ہے، ایک مسلمان دوسرے مسلمان کا بھائی ہے نہ اس پر ظلم کرتا ہے اور نہ ہی اس کی شرمندگی کا باعث بنتا ہے، اگر تمہارے پاس کوئی نیکی ہے تو اس کے ساتھ اپنے (مسلمان) بھائی کی طرف لوٹو اور اس کے ہلاکت میں مزید ہلاکت کا باعث نہ بنو۔ (مسند ابی یعلی بروایت حضرت حذیفہ (رض))
فائدہ :۔۔۔ مجبور سے خریدو فروخت کرنے سے مراد مجبور کی مجبوری کا ناجائز فائدہ اٹھانے سے ہے، ورنہ مجبوری کی حالت میں نیک نیتی کے ساتھ صحیح اسلامی طریقے سے کسی سے خریدو فروخت کرنے میں کوئی مضائقہ نہیں، واللہ اعلم بالصواب۔ (مترجم)