9906 ۔۔۔ حضرت انس بن مالک (رض) سے مروی ہے فرماتے ہیں کہ ایک اعرابی (دیہاتی) اپنا اونٹ بیچنے آیا، حضرت عمر (رض) اس کے پاس آئے اور بھاؤ تاؤ کرنے لگے، اسی دوران حضرت عمر (رض) اپنے پیر سے آہستہ آہستہ مار کر اونٹ کو دیکھنے گئے تاکہ اچھی طرح جانچ پڑتا کرسکیں، اعرابی کہنے لگا، میرے اونٹ کا پیچھا چھوڑدو، تیرا باپ نہ رہے، لیکن حضرت عمر (رض) نے اس کی باتوں پر کان نہ دھرا اور اپنے کام میں لگے رہے، (یہ دیکھ کر) اعرابی کہنے لگا میں تمہیں کوئی اچھا انسان نہیں سمجھتا، حضرت عمر (رض) جب فارغ ہوئے تو اونٹ کو خرید لیا اور کہا اس کو چلاؤ اور اس کی قیمت وصول کرلو، اعرابی بولا ہاں لیکن ذرا میں اس کی جھول وغیرہ اتارلوں تو حضرت عمر (رض) بولے کہ میں نے تواونٹ وان سب چیزوں سمیت خریدا ہے چنانچہ جس طرح اونٹ میرا ہے یہ چیزیں بھی میری ہیں، اعرابی بولا میں گواہی دیتا ہوں کہ تو اچھا آدمی نہیں ہے ، ابھی یہ بحث چل ہی رہی تھی کہ حضرت علی (رض) پہنچے، حضرت عمر (رض) نے اعرابی سے کہا کہ اگر ہم اس شخص سے فیصلہ کروالیں گے تو تم راضی ہوگے، وہ بولا ہاں، چنانچہ دونوں نے اپنے واقعہ کی تفصیلات حضرت علی (رض) سے بیان کیں تو حضرت علی (رض) نے ارشاد فرمایا کہ اے امیر المومنین ! اگر آپ نے جھول وغیرہ کی شرط پہلے ہی لگالی تھی تو یہ آپ کی ہیں شرط کے مطابق ورنہ پھر کوئی بھی شخص اپنے سامان کو اس کی قیمت سے زیادہ سجاتا سنوارتا ہی ہے، چنانچہ اونٹ سے جھول وغیرہ اتارلی گئیں اور اعرابی کے حوالے کردی گئیں اور حضرت عمر (رض) نے اونٹ کی قیمت اعرابی کو ادا کردی “۔