9993 ۔۔۔ حضرت بریدۃ (رض) فرماتے ہیں کہ میں حضرت عمر (رض) کے پاس بیٹھا ہوا تھا کہ انھوں نے ایک چیخ سنی تو فرمایا ، اے ” یرفا ! دیکھو یہ آواز کیا ہے، انھوں نے دیکھا اور آکر بتایا کہ قریش کی ایک باندی ہے جس کی ماں کو بیچا جارہا ہے، حضرت عمر (رض) نے فرمایا انصار اور مہاجرین کو بلاؤ، چنانچہ ایک گھڑی بھر کے اندر ہی گھر اور کمرہ بھر گیا، چنانچہ حضرت عمر (رض) نے اللہ تعالیٰ کی حمدوثناء بیان کی پھر فرمایا، اما بعد کیا تم لوگوں کو اس فیصلے کی خبر ہے جو رسول اللہ (صلی اللہ علیہ وآلہ وسلم) لے کر آئے ؟ سب نے کہا نہیں، تو فرمایا سو آج یہ تم سب کو معلوم ہوجائے گی، پھر اس آیت کی تلاوت فرمائی، ترجمہ (سورة محمد (صلی اللہ علیہ وآلہ وسلم)) پھر فرمایا بھائی اس سے زیادہ پریشان کن فیصلہ کیا ہوگا کہ تم میں سے کسی شخص کی ماں کو بیچا جائے جبکہ اللہ تعالیٰ نے تم پر وسعت بھی کی ہے ؟ سب نے کہا کہ جو آپ کی سمجھ میں آتا ہے وہ کیجئے، چنانچہ آپ (رض) نے تمام حدود مملکت اسلامیہ میں یہ فرمان جاری کروادیا کہ کسی آزاد کی ماں کو نہ بیچا جائے کیونکہ یہ قطع رحمی ہے اور قطع رحمی حلال نہیں “۔ (ابن المنذر، مستدرک حاکم، متفق علیہ)