Maarif ul Hadith: Hadith 1237

حضرت عائشہ صدیقہ رضی اللہ عنہا سے روایت ہے کہ جب ہم میں سے کوئی آدمی بیمار ہوتا تو رسول اللہ ﷺ اپنا داہنا ہاتھ اس کے جسم پر پھیرتے اور یہ دعا پڑھتے : “أَذْهِبِ الْبَاسَ رَبَّ النَّاسِ الخ” (اے سب آدمیوں کے پروردگار ! اس بندے کی تکلیف دور فرما دے اور شفا عطا فرما دے ، تو ہی شفا دینے والا ہے ، بس تیری ہی شفا شفا ہے ، ایسی کامل شفا عطا فرما جو بیماری کا اثر بالکل نہ چھوڑے) ۔ (صحیح بخاری و صحیح مسلم)

تشریح
بیماروں کی عیادت اور خدمت کو رسول اللہ ﷺ نے اونچے درجہ کی نیکی اور ایک طرح کی مقبول ترین عبادت قرار دیا ہے اور اس کی بڑی ترغیب دی ہے ، نیز اپنے عمل اور ارشادات سے اس کی تعلیم دی ہے کہ جب کسی مریض کی عیادت کی جائے تو اس کے لئے دعائے صحت بھی کی جائے ۔ ظاہر ہے کہ اس سے اس کو تسلی بھی ہو گی اسی سلسلہ معارف الحدیث کی تیسری جلد میں “کتاب الجنائز” کے ذیل میں اس سلسلہ کی متعدد حدیثیں درج کی جا چکی ہیں یہاں کتاب الدعوات میں بھی بعض حدیثوں کے اضافہ کے ساتھ ان کو درج کیا جا رہا ہے ۔