Maarif ul Hadith: Hadith 446

حضرت ابو ہریرہ و ابن مسعود و ابن عمر رضی اللہ عنہم سے روایت ہے کہ جو شخص وضو کرے اور اس میں اللہ کا نام لے ، تو یہ وضو اس کے سارے جسم کو پاک کر دیتا ہے ، اور جو کوئی وضو کرے اور اس میں اللہ کا نام نہ لے ، تو وہ وضو اس کے صرف اعضائے وضو ہی کو پاک کرتا ہے ۔ (سنن دار قطنی)

تشریح
اس حدیث سے معلوم ہوا کہ جو وضو اللہ کا نام لے کر مثلاً بسم اللہ پڑھ کر یا اسی طرح کوئی کلمہ ذکر زبان سے ادا کر کے کیا جائے تو اس کے اثر سے سارا جسم مطہر اور منور ہو جاتا ہے اور جو وضو اللہ کا نام لئے اور اس کا ذکر کئے بغیر کیا جائے تو اس سے صرف اعضاء وضو ہی کی طہارت ہوتی ہے ۔ اس کا مطلب یہی ہوا کہ یہ وضو بہت ناقص قسم کا ہوتا ہے ۔