سمرہ بن جندب سے روایت ہے ، کہ رسول اللہ ﷺ نے فرمایا کہ : دوزخیوں میں سے بعض وہ ہوں گے کہ جن کو پکڑے گی آگ ان کے ٹخنوں تک ، اور بعض وہ ہوں گے کہ جن کو پکڑے گی آگ ان کے زانوؤں تک ، اور بعض وہ ہوں گے کہ جن کو پکڑے گی آگ ان کے کمرتک ، اور بعض وہ ہوں گے کہ جن کو پکڑے گی آگ ان کے ہنسلی تک ۔ (مسلم)

تشریح
حدیث کا مقصد یہ ہے کہ دوزخ میں سب ایک درجہ میں اور ایک ہی حال میں نہیں ہوں گے ، بلکہ جرائم کی نوعیت کے لحاظ سے ان کے عذاب میں کمی بیشی ہو گی ، مثلاً کچھ لوگوں کا حال یہ ہو گا کہ آگ ان کے صرف ٹخنوں تک پہنچے گی ،اور کچھ لوگوں پر عذاب ان سے زیادہ ہو گا ، اور آگ ان کے زانوؤں تک پہنچے گی ، اور کچھ لوگوں پر اس سے زیادہ ہو گا ، اور آگ ان کی کمر تک پہنچا کرے گی ، اور کچھ لوگان سے بھی سخت تر اور بدتر حالت میں رہیں گے ، اور آگ ان کی گردن تک پہنچے گی ۔ اَللَّهُمَّ احْفَظْنَا