سیار بن سلامہ سے روایت ہے کہ میں اپنے والد کے ساتھ رسول اللہ صلی اللہ علیہ وسلم کے صحابی ابوبرزہ اسلمی رضی اللہ عنہ کی خدمت میں حاضر ہوا۔ تو میرے والد نے ان سے دریافت کیا کہ رسول اللہ صلی اللہ علیہ وسلم فرض نمازیں کیسے پڑھا کرتے تھے؟ (یعنی آپ صلی اللہ علیہ وسلم کے نماز پڑھنے کے اوقات کیا تھے ؟) تو انہوں نے فرمایا کہ آپ صلی اللہ علیہ وسلم دوپہر والی نماز جس کو تم “ نماز اولیٰ ” کہتے ہو (یعنی ظہر) اس وقت پڑھتے تھے جب سورج ڈھل جاتا تھا ۔ اور عصر ایسے وقت پڑھتے تھے کہ اس کے بعد ہم میں سے کوئی آدمی مدینہ کے بالکل آخری سے پر اپنے گھر واپس جاتا تو ایسے وقت پہنچ جاتا تھا کہ آفتاب زندہ ہوتا تھا (یعنی اس میں روشنی و حرارت باقی ہی رہتی تھی ۔ وہ زرد اور ٹھنڈا نہیں ہو جاتا تھا آگے سیار بن سلامہ کہتے ہیں) اور میں یہ بھول گیا کہ حضور صلی اللہ علیہ وسلم کی مغرب کی نماز کے بارے میں انہوں نے کیا بتایا تھا (آگے ابو برزہ اسلمی کا بیان نقل کرتے ہیں کہ) اور عشاء (جسے تم لوگ عتمہ کہتے ہو) رسول اللہ صلی اللہ علیہ وسلم دیر کر کے پڑھنا پسند فرماتے تھے اور اس سے پہلے سونے کو اور اس کے بعد باتیں کرنے کو ناپسند فرماتے تھے ۔ اور صبح کی نماز سے ایسے وقت فارغ ہوتے تھے جب آدمی (صبح کے اجالے میں) اپنے پاس بیٹھنے والوں کو پہچان لیتا تھا اور آپ صلی اللہ علیہ وسلم (فجر کی نماز میں) ساٹھ سے لے کر سو تک آیتیں پڑھتے تھے۔ (صحیح بخاری و صحیح مسلم)

تشریح
اس حدیث کے راوی سیار بن سلامہ کو یہ یاد نہیں رہا کہ ابو برزہ اسلمی رضی اللہ عنہ نے حضور صلی اللہ علیہ وسلم کی مغرب کی نماز کا وقت کیا بتایا تھا ، دوسری حدیثوں سے معلوم ہوتا ہے کہ آپ صلی اللہ علیہ وسلم مغرب کی نماز عام طور سے اول وقت یعنی آفتاب غروب ہوتے ہی پڑھا کرتے تھے ، کبھی کسی خاص ضرورت ار مصلحت ہی سے آپ صلی اللہ علیہ وسلم نے مغرب کی نماز کی تاخیر کر کے پڑھی ہے ۔