استحباب کے معنی ہیں، اچھا جاننا، پسند کرنا، مال کے معنی ہیں خواستہ، یعنی وہ چیز جس کی چاہ و خواہش رکھی جائے، اس کی جمع اموال ہے اور مال اصل میں میل سے مشتق ہے جس کے معنی ہیں مائل ہونا، راغب ہونا، چناچہ دھن دولت، اسباب و سامان اور جائداد وغیرہ کو مال اسی لئے کہا جاتا ہے کہ انسان ان چیزوں کی طرف طبعی طور پر رغبت و میلان رکھتا ہے۔ عمر کے معنی ہیں زندگی، زندہ رہنے کی مدت۔ اس باب میں وہ احادیث نقل کی جائیں گی جن سے معلوم ہوگا کہ اللہ تعالیٰ کی طاعت و عبادت کی خاطر، دین کی خدمت کے لئے اور اخروی فلاح و بہبود کے امور انجام دینے کی غرض سے مال و دولت کی خواہش و طلب اور درازی عمر کی آرزو رکھنا جائز ہے۔