اور حضرت جابر ابن سمرہ (رض) فرماتے ہیں کہ آقائے نامدار ﷺ فجر کی نماز میں سورت ق والقران المجید یا ایسی ہی (طویل) کوئی دوسری سورت پڑھتے تھے اور آپ ﷺ فجر کی نماز کے بعد کی دوسری نماز ہلکی پڑھتے تھے۔ (صحیح مسلم)

تشریح
حدیث کے آخری جملے کا مطلب یہ ہے کہ آپ ﷺ فجر کی نماز کے علاوہ اوقات کی نمازیں زیادہ لمبی نہیں پڑھتے تھے اور فجر کی نماز میں طویل قرأت کیا کرتے تھے کیونکہ ہنگام صبح گا ہی بارگاہ الوہیت میں دعاوئوں کے قبول ہونے اور برکت وسعادت حاصل ہونے کا وقت ہوتا ہے۔