یحییٰ بن یحییٰ تمیمی، مالک، ابن شہاب زہری سے روایت ہے کہ حضرت عمر بن عبدالعزیز نے ایک دن عصر کی نماز کافی دیر سے پڑھی حضرت عروہ بن زبیر ان کے پاس تشریف لائے اور انہیں خبر دی کہ حضرت مغیرہ بن شعبہ (رض) کوفہ میں تھے کہ ایک دن انہوں نے نماز میں دیر کردی تو حضرت ابومسعود انصاری (رض) ان کے پاس تشریف لائے اور فرمایا اے مغیرہ یہ کیا کیا ؟ کیا تو نہیں جانتا کہ حضرت جبرائیل (علیہ السلام) نازل ہوئے اور انہوں نے نماز پڑھی رسول اللہ ﷺ نے ان کے ساتھ نماز پڑھی پھر انہوں نے نماز پڑھی رسول اللہ ﷺ نے ان کے ساتھ نماز پڑھی پھر انہوں نے نماز پڑھی رسول اللہ ﷺ نے ان کے ساتھ نماز پڑھی پھر انہوں نے نماز پڑھی رسول اللہ ﷺ نے ان کے ساتھ نماز پڑھی پھر حضرت جبرائیل (علیہ السلام) نے فرمایا کہ آپ ﷺ کو اسی طرح حکم دیا گیا ہے حضرت عمر بن عبدالعزیز (رض) نے حضرت عروہ سے فرمایا اے عروہ دیکھو تم کیا بیان کر رہے ہو کہ جبرائیل نے رسول اللہ ﷺ کو نمازوں کے اوقات بتائے حضرت عروہ نے کہا کہ بشیر بن ابن مسعود نے اپنے باپ سے روایت کرتے ہوئے اسی طرح بیان فرمایا ہے۔