ابوطاہر ابن وہب، عمرو بن حارث، بکیر بن اشج، بسر بن سعید، زید بن خالد جہنی، بسر، عبیداللہ خولانی، حضرت ابوطلحہ (رض) بیان کرتے ہیں کہ رسول اللہ ﷺ نے فرمایا فرشتے اس گھر میں داخل نہیں ہوتے کہ جس گھر میں تصویر ہو۔ حضرت بسر (رض) کہتے ہیں کہ کچھ عرصہ کے بعد حضرت زید بن خالد (رض) بیمار ہوگئے تو ہم ان کی عیادت کے لئے گئے (جب ہم ان کے گھر گئے تو دیکھا) کہ ان کے گھر میں ایک پردہ ہے جس میں تصویریں بنی ہوئی ہیں میں نے عبیداللہ خولانی سے کہا کیا حضرت زید (رض) ہم کو تصویروں والی حدیث نہیں بیان کرتے تھے ؟ انہوں نے کہا ہاں ! انہوں نے بیان کی تھی مگر جب کپڑوں میں نقش ونگار ہوں کیا تو نے یہ نہیں سنا ؟ میں نے کہا نہیں انہوں نے کہا کہ حضرت زید (رض) نے اسی طرح کہا تھا۔