حضرت ابن عباس (رض) سے مروی ہے کہ جب نبی ﷺ کو غسل دینے پر اتفاق رائے ہوگیا، تو اس وقت گھر میں صرف نبی ﷺ کے اہل خانہ ہی تھے مثلا ان کے چچا حضرت عباس، حضرت علی، فضل، قثم، اسامہ بن زید (رض) اور صالح اسی دوران گھر کے دروازے پر کھڑے حضرت اوس بن خولی انصاری خزرجی بدری (رض) نے حضرت علی (رض) کو پکار کر کہا کہ اے علی (رض) میں آپ کو اللہ کی قسم دیتا ہوں کہ ہمارا حصہ بھی رکھنا، حضرت علی (رض) نے ان سے فرمایا اند آجاؤ، چناچہ وہ بھی داخل ہوگئے اور اس موقع پر موجود رہے گو کہ انہوں نے غسل میں شرکت نہیں کی۔ انہوں نے نبی ﷺ کو اپنے سینے سے سہارا دیا، جبکہ قمیص جسم پر ہی تھی، حضرت عباس (رض) ، فضل اور قثم (رض) پہلو مبارک بدل رہے تھے، حضرت علی (رض) ان کا ساتھ دے رہے تھے، حضرت اسامہ اور صالح پانی ڈال رہے تھے اور حضرت علی (رض) غسل دے رہے تھے، نبی ﷺ کی کوئی ایسی چیز ظاہر نہیں ہوئی جو میت کی ظاہر ہوا کرتی ہے، حضرت علی (رض) غسل دیتے ہوئے کہتے جارہے تھے میرے ماں باپ آپ پر قربان ہوں، آپ حیاومیتا کتنے پاکیزہ رہے، یاد رہے کہ نبی ﷺ کو غسل پانی اور بیری سے دیا گیا تھا غسل سے فراغت کے بعد صحابہ (رض) نے نبی ﷺ کے جسم مبارک کو خشک کیا، پھر وہی کیا جو میت کے ساتھ کیا جاتا ہے یعنی انہیں تین کپڑوں میں لپیٹ دیا گیا جن میں سے دو سفید تھے اور ایک دھاری دار سرخ یمنی چادر تھی، پھر معلوم ہوا کہ حضرت ابوعبیدہ بن الجراح (رض) صندوقی قبر بناتے ہیں جیسے اہل مکہ اور حضرت ابو طلحہ (رض) جن کا اصل نام زید بن سہل تھا، اہل مدینہ کے لئے بغلی قبر بناتے ہیں تو حضرت عباس (رض) نے دو آدمیوں کو بلایا، ایک کو حضرت ابوعبیدہ (رض) کے پاس بھیجا اور دوسرے کو ابو طلحہ (رض) کے پاس اور دعاء کی کہ اے اللہ ! اپنے پغمبر کے لئے جو بہتر ہو اسی کو پسند فرما لے، چناچہ حضرت ابو طلحہ (رض) کے پاس جانے والے آدمی کو حضرت ابوطلحہ (رض) مل گئے اور وہ انہی کو لے کر آگیا، اس طرح نبی ﷺ کے لئے بغلی قبر تیار کی گئی۔