حضرت جابر بن عتیک (رض) سے مروی ہے کہ ہمارے پاس بنو معاویہ میں ایک مرتبہ حضرت ابن عمر (رض) آئے جو انصار کی ایک بستی ہے اور مجھ سے فرمایا کیا تمہیں معلوم ہے کہ نبی کریم ﷺ نے تمہاری اس مسجد میں کہاں نماز پڑھی تھی ؟ میں نے کہا جی ہاں ! اور مسجد کے ایک کونے کی طرف اشارہ کردیا پھر انہوں نے فرمایا کیا تمہیں معلوم ہے کہ نبی کریم ﷺ نے جن تین چیزوں کی دعا یہاں مانگی تھی وہ کیا ہیں ؟ میں نے عرض کیا جی ہاں ! انہوں نے فرمایا بتاؤ وہ کیا ہیں ؟ میں نے عرض کیا نبی کریم ﷺ نے یہ دعا فرمائی تھی کہ اللہ تعالیٰ مسلمانوں پر کسی بیرونی دشمن کو مسلط نہ کرے اور انہیں قحط سالی سے ہلاک نہ کرے یہ دونوں دعائیں قبول ہوگئیں۔ اور تیسری دعا یہ فرمائی کہ ان کی جنگ آپس میں نہ ہونے لگے لیکن اللہ نے یہ دعا قبول نہیں فرمائی حضرت ابن عمر (رض) نے فرمایا تم نے صحیح بیان کیا قیامت تک اسی طرح قتل و غارت گری ہوتی رہے گی۔