حضرت قتیلہ سے مروی ہے کہ اہل کتاب کا ایک بڑا عالم بارگاہ نبوت میں حاضر ہوا اور کہنے لگا کہ اے محمد ﷺ ! تم لوگ بہترین قوم ہوتے اگر تم شرک نہ کرتے، نبی ﷺ نے فرمایا سبحان اللہ ! وہ کیسے ؟ اس نے کہا کہ آپ لوگ قسم کھاتے ہوئے کعبہ کی قسم کھاتے ہیں، نبی ﷺ نے کچھ دیرسکوت کے بعد فرمایا یہ صحیح کہہ رہا ہے، اس لئے آئندہ جو شخص قسم کھائے وہ رب کعبہ کی قسم کھائے، پھر اس نے کہا کہ اے محمد ﷺ ! اگر تم لوگ اللہ کے ساتھ کسی کو شریک نہ ٹھہراتے تو تم بہترین قوم ہوتے، نبی ﷺ نے فرمایا سبحان اللہ ! وہ کیسے ؟ اس نے کہا کہ آپ لوگ کہتے ہیں جو اللہ نے چاہا اور آپ نے چاہا، نبی ﷺ نے کچھ دیرسکوت کے بعد فرمایا یہ صحیح کہہ رہا ہے، اس لئے جو شخص یہ کہے اسے چاہئے کہ ان دونوں جملوں کے درمیان فصل پیدا کیا کرے۔