عبداللہ بن الحارث کہتے ہیں کہ ان کے والدحارث حضرت عثمان (رض) کے کھانے کے ذمے دار تھے، عبداللہ بن حارث کہتے ہیں کہ وہ منطر میری نگاہوں میں اب بھی محفوظ ہے کہ ہانڈیوں کے گرد گھوڑے کا گوشت پڑا ہوا ہے، ایک آدمی آیا اور کہنے لگا کہ حضرت علی (رض) اسے اچھا نہیں سمجھتے، حضرت عثمان غنی (رض) نے انہیں بلا بھیجا، حضرت علی (رض) اپنے ہاتھوں سے گردوغبار جھارتے ہوئے آئے، حضرت عثمان (رض) نے ان سے فرمایا کہ آپ ہم سے بہت زیادہ اختلاف کرتے ہیں، یہ سن کر حضرت علی (رض) نے فرمایا کہ میں ہر اس شخص کو قسم دے کر کہتا ہوں جو اس موقع پر نبی ﷺ کی خدمت میں موجود تھا جبکہ نبی ﷺ کے پاس ایک جنگلی گدھے کے سرین لائے گئے تو نبی ﷺ نے فرمایا کہ ہم محرم لوگ ہیں، یہ اہل حل کو کھلا دو ، کیا ایسا ہے یا نہیں ؟ اس پر نبی ﷺ کے کچھ صحابہ (رض) کھڑے ہوگئے جنہوں نے حضرت علی (رض) کی تصدیق کی۔ پھر حضرت علی (رض) نے فرمایا کہ جس وقت نبی ﷺ کے پاس شتر مرغ کے پانچ انڈے لائے گئے، اس موقع پر موجود صحابہ کرام (رض) کو میں قسم دے کر پوچھتا ہوں کہ کیا نبی ﷺ نے یہ نہیں فرمایا تھا کہ ہم محرم لوگ ہیں، یہ غیر محرم لوگوں کو کھلا دو ؟ اس پر کچھ صحابہ کرام (رض) کھڑے ہوگئے، یہ دیکھ کر حضرت عثمان (رض) دستر خوان سے اٹھ کر اپنے خیمے میں چلے گئے اور وہ کھانا اہل ماء ہی نے کھالیا۔