ابو امامہ بن سہل بن حنیف (رض) نے بتایا کہ ایک مسکین عورت بیمار ہوئی۔ رسول اللہ (صلی اللہ علیہ وآلہ وسلم) کو اس کی بیماری کی اطلاع دی گئی۔ ابو امامہ کہتے ہیں کہ رسول اللہ (صلی اللہ علیہ وآلہ وسلم) مساکین کی تیمارداری فرماتے اور ان کی خیریت دریافت فرمایا کرتے تھے۔ پس رسول اللہ (صلی اللہ علیہ وآلہ وسلم) نے فرمایا۔ کہ جب وہ فوت ہوجائے تو مجھے اطلاع دینا۔ پس اس کا جنازہ رات کو اٹھایا گیا اور لوگوں نے رسول اللہ (صلی اللہ علیہ وآلہ وسلم) کو جگانا مناسب خیال نہ کیا ( کہ آپ (صلی اللہ علیہ وآلہ وسلم) کے آرام میں خلل نہ واقع ہو) جب صبح ہوءی تو حضور (علیہ السلام) کو یہ بات بتائی گئی تو آپ (صلی اللہ علیہ وآلہ وسلم) نے فرمایا۔ کیا میں نے تمہیں نہ کہا تھا کہ مجھے اس کی اطلاع دینا ؟ انھوں نے عرض کیا یا رسول اللہ (صلی اللہ علیہ وآلہ وسلم) ہم نے رات کے وقت آپ کو باہر لے جانا اور نیند سے بیدار کرنا پسند نہ کیا۔ پس جناب رسول اللہ (صلی اللہ علیہ وآلہ وسلم) باہر تشریف لے گئے اور لوگوں نے اس کی قبر پر صف بنائی اور حضور (صلی اللہ علیہ وآلہ وسلم) نے اس کی نماز جنازہ میں چار تکبیریں پڑھیں۔ ( اس روایت کو امام مالک (رح) نے باب التکبیر علی الجنائز میں ذکر کیا ہے)
قول محمد (رح) یہ ہے : ہم اسی کو اختیار کرتے ہیں۔ جنازہ کی چار تکبیرات ہیں۔ جس کی نماز جنازہ پڑھ لی جائے دوبارہ اس کی نماز جنازہ نہ پڑہی جائے۔ یہ آپ (صلی اللہ علیہ وآلہ وسلم) کی خصوصیت ہے اس میں دوسروں کا وہ حکم نہیں جو آپ (صلی اللہ علیہ وآلہ وسلم) کا ہے۔ ( اس خصوصیت کی دلیل) یہ ہے کہ آپ (صلی اللہ علیہ وآلہ وسلم) نے نجاشی کی نماز جنازہ مدینہ منورہ میں ادا فرمائی حالانکہ اس کی موت حبشہ میں ہوئی۔ پس رسول اللہ (صلی اللہ علیہ وآلہ وسلم) کی نماز جنازہ بیشمار برکات رکھتی تہی۔ اور پاکیزگی کا باعث تہی۔ دوسروں کی نماز کی طرح نہ تھی ( گویا یہ آپ کی خصوصیت ہے) اور امام ابوحنیفہ (رح) کا بھی یہی قول ہے)