صدقہ بن یسار مکی کہتے ہیں کہ میں نے عبداللہ بن عمر (رض) کو کہتے سنا جبکہ ہم ان کے پاس یوم الترویہ سے دو یا تین دن پہلے حاضر ہوئے اور لوگ ان کے پاس مسائل دریافت کرنے آرہے تھے۔ اسی دوران ان کے پاس ایک یمنی آیا۔ جس کے سر کے بال پراگندہ تھے۔ اور اس نے کہا اے ابو عبد الرحمن ! میں نے اپنے بال گوندھ لیے ہیں اور صرف عمرہ کا احرام باندھا ہے۔ آپ اس سلسلہ میں کیا فرماتے ہیں۔ آپ نے جوابا فرمایا اگر میں تمہارے احرام باندھنے کے وقت تمہارے ساتھ ہوتا تو میں تمہیں حج قران کا حکم دیتا ۔ کہ بیت اللہ کا طواف اور صفا مروہ کے درمیان سعی کرتے اور احرام کی حالت میں رہتے اور تمہارے لے کچھ بھی حلال نہ ہوتا یہاں تک کہ تم قربانی کرتے تو سب کجھ حلال ہوجاتا۔ اور قربانی کا جانور ذبح کرتے۔ ابن عمر (رض) نے اس سے کہا اپنے پراگندہ بالوں کو کترالو اور ہدی دے دو ۔ گھر میں سے ایک عورت نے سوال کیا کہ اس کی ہدی کیا ہے ؟ آپ نے جواب دیا۔ اس کی ہدی۔ اس کی عورت نے سوال تین مرتبہ کیا آپ نے ہر مرتبہ یہی کہا اس کی ہدی ( اونٹ ، گائے، بکری) پھر ابن عمر (رض) خاموش ہوگئے۔ جب ہم نکلنے لگے تو آپ نے فرمایا مجھے ہدی کی ایک بکری مل جائے تو وہ مجھے روزہ رکھنے سے زیادہ پسند ہے۔
قول محمد (رح) یہ ہے : ان تمام کو ہم اختیار کرتے ہیں۔ قران ہمارے ہاں افضل ہے۔ جیسا کہ عبداللہ بن عمر (رض) نی ارشاد فرمایا۔ جب عمرہ کا احرام باندھ کر تمتع کا ارادہ کرے تو طواف اور سعی کرکے بال کرتوائے۔ پھر حج کے لیے از سر نو احرام باندھے۔ دسویں ذی الحجہ کو حلق کرکے ایک بکری ذبح کرے یہ بھی جائز ہے۔ جیسا کہ عبداللہ بن عمر (رض) نے فرمایا۔ یہی امام ابوحنیفہ (رح) اور ہمارے عام فقہاء کا قول ہے۔