ام المؤمنین عائشہ صدیقہ (رض) فرماتی ہیں کہ ہم حجۃ الوداع کے سال رسول اللہ (صلی اللہ علیہ وآلہ وسلم) کے ساتھ ( مدینہ منورہ سے) نکلیں۔ ہم نے عمرہ کا احرام باندھا۔ پھر رسول اللہ (صلی اللہ علیہ وآلہ وسلم) نے فرمایا کہ جس کے ساتھ ہدی ہے وہ عمرہ کے ساتھ حج کا بھی احرام باندھے۔ پھر وہ حلال نہ ہوگا ۔ جب تک کہ ان دونوں سے حلال نہ ہو۔ ام المؤمنین کہتی ہیں کہ جب میں مکہ پہنچی تو حالت ماہواری سے تھی۔ پس میں نے نہ تو بیت اللہ کا طواف کیلا اور نہ صفا مروہ کی سعی کی۔ پھر میں نے اس کی شکایت رسول اللہ (صلی اللہ علیہ وآلہ وسلم) کی خدمت میں کی۔ آپ (صلی اللہ علیہ وآلہ وسلم) نے فرمایا تو اپنے سر کی مینڈھیاں کھول دے۔ اور کنگھی کر اور حج کا احرام باندھ لے۔ اور عمرہ ترک کردے۔ ام المؤمنین کہتی ہیں کہ میں نے اسی طرح کیا۔ جب ہم نے حج کرلیا تو رسول اللہ (صلی اللہ علیہ وآلہ وسلم) نے مجھے عبد الرحمن بن ابی بکر (رض) کے ساتھ تنعیم کے مقام کی طرف بھیجا تو میں نے عمرہ ( کا احرام باندھا اور) ادا کیا۔ اس پر نبی اکرم (صلی اللہ علیہ وآلہ وسلم) نے فرمایا۔ یہ عمرہ تیرے اس ترک شدہ عمرہ کی جگہ ہے۔ بس جن لوگوں نے عمرہ کا احرام باندھا تھا انھوں نے بیت اللہ طواف کیا اور صفا ومروہ کے درمیان سعی کی، پھر وہ حلال ہوگئے۔ اور منی سے واپسی کے بعد انھوں نے ایک اور طواف اپنے حج کی طرف سے کیا ۔ لیکن جن لوگوں نے حج کا یا حج اور عمرہ دونوں کا احرام باندھا تھا۔ تو انھوں نے ایک ہی طواف کیا۔ (اس روایت کو امام مالک (رح) نے باب دخول الحائض مکۃ میں ذکر کیا ہے)
قول محمد (رح) یہ ہے : ہم اسی طو اختیار کرتے ہیں۔ حائض تمام منااسک حج کو ادا کرتی جائے گی۔ البتہ طواف بیت اللہ اور سعی صفا ومروہ اس وقت تک نہ کرے گی۔ جب تک وہ طہارت تامہ حاصل نہ کرے گی۔ اگر اس نے عمرہ کا احرام باندھ رکھا ہے اور اسے خطرہ ہے کہ حج فوت ہوجائے گا تو حج کا احرام باندھ لے اور وقوف عرفات کرے اور عمرہ کو چھوڑ دے۔ جب وہ اپنے حج کے تمام افعال سے فراغت پالے تو وہ عمرے کی قضا کرے جس طرح کہ ام المؤمنین (رض) عنہا نے قضا کیا۔ اور جو ہدی میسر آئے وہ ذبح کرے ہمیں یہ روایت پہنچی ہے کہ نبی اکرم (صلی اللہ علیہ وآلہ وسلم) نے عائشہ (رض) عنہا کی طرف سے ایک گائے ذبح کی۔ یہ تمام امام ابوحنیفہ (رح) کا قول ہے۔ سوائے اس صورت کے کہ جس نے حج وعمرہ کو جمع کیا ہو وہ دو طواف اور دو سعیاں کرے۔