سعید بن مسیب (رح) ابوہریرہ (رض) سے روایت کرتے ہیں کہ ایک دیہاتی نبی اکرم (صلی اللہ علیہ وآلہ وسلم) کی خدمت اقدس میں حاضر ہوا۔ اور اس نے کہا میری بیوی کے ہاں بچہ پیدا ہوا ہے۔ اس کا رنگ سیاہ ہے۔ رسول اللہ (صلی اللہ علیہ وآلہ وسلم) نے فرمایا کہ تمہارے ہاں اونٹ ہیں۔ اس نے کہا جی ہاں جناب رسول اللہ (صلی اللہ علیہ وآلہ وسلم) نے اس سے دریافت فرمایا۔ کس رنگ کے ہیں اس نے کہا سرخ ہیں۔ آپ (صلی اللہ علیہ وآلہ وسلم) نے فرمایا ان میں کوئی خاکستری رنگ کا بھی ہے ؟ اس نے کہا جی ہاں ! آپ (صلی اللہ علیہ وآلہ وسلم) نے سوال کیا ایسا کیوں ہوا ؟ اس نے کہا کسی رگ نے اسے کھینچا ہوگا تو رسول اللہ (صلی اللہ علیہ وآلہ وسلم) نے فرمایا تیرے بچہ کو بھی کسی رگ (آبائی) نے کھینچا ہوگا۔
قول محمد (رح) یہ ہے : کہ کسی کو جائز نہیں کہ وہ اپنے بچے کو اس قسم کے شبہ کی بناء پر مسترد کردے۔