قاسم (رح) کہتے ہیں کہ ایک یمنی جس کا اک ہاتھ اور ایک پاؤں کٹا ہوا تھا وہ مدینہ منورہ آیا اور اس نے صدیق اکبر (رض) کی خدمت میں شکایت کی کہ عامل یمن نے اس کے ساتھ ظلم کیا ہے۔ قاسم کہتے ہیں کہ وہ نماز تہجد پڑھا کرتا تھا۔ حضرت ابوبکر (رض) نے فرمایا۔ تیرے باپ کے مالک کی قسم ! تیری رات چوروں کی رات نہیں پھر ابوبکر (رض) کی اہلیہ اسماء بنت عمیس کا ایک ہار گم ہوگیا تو وہ شخص لوگوں کے ساتھ پھرتا تھا اور کہتا تھا کہ اللہ تعالیٰ اسے برباد کرے جس نے اس نیکوکار کے گھر میں چوری کی۔ لوگوں نے وہ ہار ایک سنار کے ہاں پالیا۔ اس نے بتلایا کہ یہ اسے اسی کٹے ہوئے ہاتھ والے شخص نے دیا ہے۔ اس نے اعتراف بھی کرلیا یا گواہی سے ثابت ہوگیا تو حضرت ابوبکر (رض) نے حکم دیا اور اس کا بایاں ہاتھ کاٹ دیا گیا۔ حضرت ابوبکر (رض) نے فرمایا میرے نزدیک اس کی چوری سے زیادہ سخت بات اس کی اپنے حق میں بد دعا ثابت ہوئی ہے۔ (اس روایت کو امام مالک نے باب جامع القطع میں ذکر کیا ہے)
قول محمد (رح) یہ ہے : یہ ہر وایت حضرت عائشہ (رض) عنہا سے روایت کی جاتی ہے کہ انھوں نے فرمایا جس شخص نے حضرت اسماء کا زیور چرایا تھا اس کا دایاں ہاتھ کٹا ہوا تھا تو حضرت ابوبکر (رض) نے اس کا بایا پاؤں کاٹ دیا۔ وہ اس بات سے انکار کرتی تھیں کہ اس کا ایک ہاتھ اور ایک پاؤں کٹا ہوا تھا۔ ابن شہاب زہری اس خبر کو اور اس جیسی دیگر خبروں کو اپنے شہر کے دوسرے لوگوں کی نسبت زیادہ جانتے تھے۔ ہمیں یہ بات پہنچی ہے کہ عمر بن خطاب (رض) اور علی بن ابی طالب (رض) چور کے دائیں ہاتھ اور بائیں پاؤں سے زیادہ نہ کاٹتے تھے۔ اگر کوئی چور اس کے بعد بھی پکڑا جاتا تو وہ نہ کاٹتے تھے بلکہ اس سے تاوان وصول کرتے تھے۔ یہی امام ابوحنیفہ (رح) اور ہمارے عام فقہاء کا قول ہے۔