ابو وعلہ مصری نے ابن عباس (رض) سے نقل کیا جب کہ ان سے انگور نچوڑنے کا حکم دریافت کی گیا۔ تو فرمانے لگے۔ ایک شخص رسول اللہ (صلی اللہ علیہ وآلہ وسلم) کی خدمت میں شراب کی ایک مشک لایا۔ آپ (صلی اللہ علیہ وآلہ وسلم) نے اس سے فرمایا کیا تمہیں معلوم نہیں کہ اللہ تعالیٰ نے اسے حرام کردیا ہے “۔ اس نے عرض کیا نہیں۔ اس کے پاس بیٹھے ہوئے ایک شخص نے اسے چپکے سے کچھ کہا۔ تو آپ (صلی اللہ علیہ وآلہ وسلم) نے فرمایا۔ تو نے اسے کیا کہا ہے ؟ اس نے عرض کیا یا رسول اللہ (صلی اللہ علیہ وآلہ وسلم) میں نے اسے اس کے بیچ ڈالنے کا مشورہ دیا ہے تو آپ (صلی اللہ علیہ وآلہ وسلم) نے فرمایا۔ جس نے اس کا پینا حرام کیا اس نے اس کا فروخت کرنا بہی حرام قرار دیا ہے۔ ابن عباس کہتے ہیں کہ اس پر اس شخص نے مشکیزے کا منہ کھول دیا۔ جس سے تمام شراب بہہ گئی۔ ( اس اثر کو باب جامع تحریم الخمر میں امام مالک (رح) نے ذکر کیا ہے)