کبشہ بنت کعب نے جو ابو قتادہ کی بہو تھیں بیان کیا کہ ابو قتادہ (رض) میرے ہان تشریف لائے اور کبشہ نے ان کے وضو کے لیے پانی ڈالا۔ اچانک ایک بلی آ نکلی اور اس برتن سے پانی پینے لگی ابو قتادہ نے بلی کی طرف برتن جھکا دیا۔ پس بلی نے اس میں سے پانی پی لیا۔ ابو قتادہ (رض) نے دیکھا کبشہ تعجب سے دیکھ رہی ہے۔ پس فرمانے لگے اے میری بھتیجی ! کیا تو حیران ہورہی ہے ؟ میں نے کہا جی ہاں ! تو وہ فرمانے لگے رسول اللہ (صلی اللہ علیہ وآلہ وسلم) نے فرمایا کہ یہ نجس نہیں کیونکہ یہ ہر وقت ہر جگہ تمہارے پاس گھومتی پھرتی ہے۔ (امام مالک نے اس روایت کو باب الطہور للوضوء میں ذکر کیا ہے)
قول محمد (رح) یہ ہے کہ بلی کے جھوٹے پانی سے وضو کرلینے میں کچھ قباحت نہیں۔ البتہ دیگر پانی موجود ہو تو اس کو ترجیح دی جائے گی۔ (یہ امام ابوحنیفہ (رح) کا قول ہے)