ابوہریرہ رضی الله عنہ سے روایت ہے کہ جب رسول اللہ ﷺ کی وفات ہوگئی اور آپ کے بعد ابوبکر (رض) خلیفہ بنائے گئے، اور عربوں میں سے جنہیں کافر مرتد ہونا تھا کافر ہوگئے تو عمر (رض) نے ابوبکر (رض) سے کہا : آپ لوگوں سے کیسے لڑیں گے ؟ جب کہ رسول اللہ ﷺ نے فرمایا ہے : مجھے حکم دیا گیا ہے کہ میں لوگوں سے لڑوں یہاں تک کہ یہ لا الٰہ الا اللہ کا اقرار کرلیں، تو جس نے لا الٰہ الا اللہ کا اقرار کرلیا، اس نے مجھ سے اپنے مال اور اپنی جان کو سوائے اسلام کے حق ١ ؎ کے مجھے سے محفوظ کرلیا۔ اور اس کا حساب اللہ کے سپرد ہے ٢ ؎ اس پر ابوبکر (رض) نے کہا : میں اس شخص سے ضرور لڑوں گا جو نماز اور زکاۃ میں فرق کرے گا (یعنی نماز تو پڑھے اور زکاۃ دینے سے منع کرے) کیونکہ زکاۃ مال کا حق ہے، قسم اللہ کی، اگر یہ اونٹ باندھنے کی رسی بھی جو وہ رسول اللہ ﷺ کو ادا کیا کرتے تھے مجھ سے روکیں گے، تو میں ان سے ان کے روکنے پر لڑوں گا، عمر (رض) نے فرمایا : اللہ کی قسم ! زیادہ دیر نہیں ہوئی مگر مجھے یقین ہوگیا کہ اللہ تعالیٰ نے ابوبکر (رض) کو قتال کے سلسلے میں شرح صدر عطا کردیا ہے، اور میں نے جان لیا کہ یہ (یعنی ابوبکر (رض) کی رائے) حق ہے۔ تخریج دارالدعوہ : صحیح البخاری/الزکاة ١ (١٣٩٩) ، ٤٠ (١٤٥٧) ، المرتدین ٣ (٦٩٢٤) ، الاعتصام ٢ (٧٢٨٤) ، صحیح مسلم/الإیمان ٨ (٢٠) ، سنن ابی داود/الزکاة ١ (١٥٥٦) ، سنن الترمذی/الإیمان ١ (٢٦٠٧) ، (تحفة الأشراف : ١٠٦٦٦) ، مسند احمد ١/١٩، ٤٧، ٢/٤٢٣، ویأتی عند المؤلف فی الجھاد ١، (بأرقام : ٣٩٧٥، ٣٩٧٦، ٣٩٧٨، ٣٩٨٠) ، وفی المحاربة ١ (بأرقام : ٣٩٧٤- ٣٩٧٦، ٣٩٧٨) ، وقد أخرجہ : سنن ابن ماجہ/الفتن ١ (٣٩٢٧) (صحیح ) وضاحت : ١ ؎: سوائے اسلام کے حق کے کا مطلب یہ ہے کہ اگر قبول اسلام کے بعد کسی نے ایسا جرم کیا جو قابل حد ہے تو وہ حد اس پر ضرور نافذ ہوگی، مثلاً چوری کی تو اس کا ہاتھ کاٹا جائے گا، زنا کیا تو غیر شادی شدہ کو سو کوڑوں کی سزا یا رجم کی سزا، کسی کو ناحق قتل کیا تو قصاص میں قتل کی، سزا دی جائے گی۔ ٢ ؎: اور ان کا حساب اللہ کے سپرد ہے کا مطلب ہے اگر وہ قبول اسلام میں مخلص نہیں ہوں گے بلکہ منافقانہ طور پر اسلام کا اظہار کریں گے، یا قابل جرم کام کا ارتکاب کریں گے لیکن اسلامی عدالت اور افسران مجاز کے علم میں نہیں آسکا، تو ان کا حساب اللہ کے سپرد ہوگا یعنی آخرت میں اللہ تعالیٰ ان کا فیصلہ فرمائے گا۔ قال الشيخ الألباني : صحيح صحيح وضعيف سنن النسائي الألباني : حديث نمبر 2443