عبداللہ بن عباس رضی الله عنہما کہتے ہیں کہ رسول اللہ ﷺ نے فرمایا : کیا میں تمہیں لوگوں میں مرتبہ کے اعتبار سے بہترین شخص کے بارے میں نہ بتاؤں ؟ ہم نے عرض کیا : کیوں نہیں، ضرور بتائیے اللہ کے رسول ! آپ نے فرمایا : وہ شخص ہے جو اللہ کی راہ میں اپنے گھوڑے کا سر تھامے رہے یہاں تک کہ اسے موت آجائے، یا وہ قتل کردیا جائے، اور میں تمہیں اس شخص کے بارے میں بتاؤں جو مرتبہ میں اس سے قریب تر ہے ۔ ہم نے عرض کیا : جی ہاں، اللہ کے رسول ! بتائیے، آپ نے فرمایا : یہ وہ شخص ہے جو لوگوں سے کٹ کر کسی وادی میں (گوشہ نشین ہوجائے) نماز قائم کرے، زکاۃ دے اور لوگوں کے شر سے الگ تھلگ رہے، اور میں تمہیں لوگوں میں برے شخص کے بارے میں بتاؤں ؟ ، ہم نے عرض کیا : جی ہاں، اللہ کے رسول ! ضرور بتائیے، آپ نے فرمایا : وہ شخص ہے جس سے اللہ کے نام پر مانگا جائے اور وہ نہ دے ۔ تخریج دارالدعوہ : سنن الترمذی/فضائل الجھاد ١٨ (١٦٥٢) ، (تحفة الأشراف : ٥٩٨٠) ، مسند احمد (١/٢٣٧، ٣١٩، ٣٢٢) ، سنن الدارمی/الجھاد ٦ (٢٤٤٠) (صحیح ) قال الشيخ الألباني : صحيح صحيح وضعيف سنن النسائي الألباني : حديث نمبر 2569