Al Tahawi: Hadith 1145

١١٤٥: ابراہیم نے علقمہ اور اسود دونوں سے نقل کیا کہ دونوں نے حضرت عمر (رض) سے اسی طرح سنا کہ انھوں نے تکبیر افتتاح کہی اور اپنی آواز کو بلند کیا اور سبحانک اللہم بھی ذرا زور سے پڑھی تاکہ لوگ سیکھ لیں (کہ اس مقام پر یہی پڑھی جاتی ہے) امام طحاوی (رح) فرماتے ہیں کچھ لوگوں کا خیال ہے کہ نمازی کے لیے یہی مناسب ہے کہ جب وہ نماز کو شروع کرے تو یہی الفاظ کہے اور اعوذ باللہ کے علاوہ کسی چیز کا اضافہ نہ کرے جبکہ وہ امام یا اپنی نماز پڑھنے والا ہو یہ امام ابوحنیفہ (رح) کا قول ہے۔ دوسروں نے اس سے اختلاف کرتے ہوئے کہا کہ مناسب یہ ہے کہ اس کے بعد وہ الفاظ بھی پڑھے جائیں جو حضرت علی (رض) کی روایت میں مذکور ہیں۔ چنانچہ انھوں نے یہ روایات ذکر کیں۔
تخریج : بیہقی ٢؍٥٢‘ ابن ابی شیبہ ١؍٢١٠۔
حاصل روایات : یہاں تک جس قدر روایات و آثار گزرے ان میں تکبیر افتتاح کے بعد سبحانک اللہم کا پڑھنا مذکور ہے انی وجہت مذکور نہیں معلوم ہوا کہ ثنا ہی لازم ہے اگر امام ہو یا مقتدی تکبیر افتتاح کے بعد سبحانک اللہم پڑھے اس پر اضافہ نہ کرے امام تعوذ تسمیہ و قراءت سب کچھ پڑھے گا یہ امام ابوحنیفہ و امام محمد و احمد (رح) کا مسلک ہے۔