Al Tahawi: Hadith 1158

١١٥٨: ابو زرعہ بن عمرو بن جریر کہتے ہیں کہ ابوہریرہ (رض) نے ہمیں بیان کیا کہ جناب رسول اللہ (صلی اللہ علیہ وآلہ وسلم) جب دوسری رکعت کے لیے کھڑے ہوتے تو رکعت کی قراءت کو الحمدللہ سے شروع فرماتے اور سکوت نہ فرماتے۔ امام طحاوی (رح) فرماتے ہیں اس سے یہ واضح دلیل مل گئی کہ بسم اللہ فاتحہ کا حصہ نہیں۔ اگر فاتحہ کا حصہ ہوتی تو دوسری رکعت میں پڑھی جاتی۔ جیسا کہ آپ نے فاتحہ کو پڑھا ‘ رہے وہ لوگ جنہوں نے پہلی رکعت میں اس کے جہر کے ساتھ پڑھنے کو مستحب قرار دیا تو ان کے ہاں اس کی وجہ فاتحۃ الکتاب کا حصہ ہونا ہے اور دوسری رکعت میں بھی انھوں نے مستحب قرار دیا۔ جب روایت بالا سے اس کے دوسری رکعت میں رسول اللہ (صلی اللہ علیہ وآلہ وسلم) سے نفی ہوگئی تو اس سے پہلی رکعت کے اندر پڑھنے کی بھی نفی ہوگئی۔ تو یہ روایت نعیم بن مجمر کی روایت کے معارض بنی اور یہ روایت اس سے سند کی پختگی کے لحاظ سے بہتر ہے۔ رہی وہ روایت جس کو حضرت امّ سلمہ (رض) نے ابن ابی ملکیہ سے ذکر کیا تو خود اس روایت کے الفاظ میں شدید اختلاف تھا۔ بعض نے اسی طرح روایت کی جس طرح ہم نے اور بعض نے دوسرے انداز سے روایت کی۔
تخریج : مسلم فی المساجد نمبر ١٤٨۔
فریق اوّل کی روایات کے جوابات :
نعیم بن مجمر کی روایت سے روایت ابوہریرہ (رض) سند کے اعتبار سے اعلیٰ اور صحت متن میں بھی افضل ہے پس اس کو ترجیح حاصل ہوگی روایت ابوہریرہ (رض) کا حاصل یہ ہے کہ بسم اللہ سورة فاتحہ کا حصہ نہیں اگر اس کا حصہ ہوتی تو دوسری رکعت میں اس کو پڑھا جاتا جیسا کہ فاتحہ کو پڑھا گیا پس ثابت ہوگیا کہ جب دوسری رکعت میں اس کا پڑھنا ثابت نہ ہوا تو پہلی رکعت میں بھی منتفی ہوا۔
روایت امّ سلمہ (رض) کا جواب :
اس روایت کے الفاظ میں اختلاف ہے ‘ اضطراب متن کی وجہ سے قابل حجت نہیں جیسا کہ دوسری سند سے روایت امّ سلمہ (رض) سے ظاہر ہو رہا ہے۔