Al Tahawi: Hadith 1828

١٨٢٨: عروہ بن زبیر مروان بن الحکم سے بیان کرتے ہیں کہ اس نے حضرت ابوہریرہ (رض) سے سوال کیا کہ کیا تم نے رسول اللہ (صلی اللہ علیہ وآلہ وسلم) کے ساتھ صلوۃ خوف پڑھی ہے ؟ تو انھوں نے کہا جی ہاں۔ مروان نے سوال کیا کب ؟ تو ابوہریرہ (رض) نے کہا غزوہ نجد کے موقعہ پر جناب رسول اللہ (صلی اللہ علیہ وآلہ وسلم) نماز عصر کے لیے کھڑے ہوئے اور ایک جماعت آپ کے ساتھ کھڑی ہوئی اور دوسری جماعت دشمن کے بالمقابل کھڑی تھی ان کی پشتیں قبلہ کی طرف تھیں پس جناب رسول اللہ (صلی اللہ علیہ وآلہ وسلم) نے تکبیر کہی اور ان تمام نے آپ کے ساتھ تکبیر کہی ان سمیت جو دشمن کے مقابلے تھے۔ پھر جب رسول اللہ (صلی اللہ علیہ وآلہ وسلم) نے رکوع کیا اور ایک رکعت اپنے ساتھ والی جماعت کو مکمل کرائی اور سجدہ کیا پھر جناب رسول اللہ (صلی اللہ علیہ وآلہ وسلم) کھڑے ہوئے اور آپ کے ساتھ والا گروہ بھی کھڑا ہوا اور دشمن کی طرف جا کر اس کے مقابل صف بستہ ہوگئے اور دوسرا گروہ آیا جو کہ پہلے دشمن کے سامنے کھڑا تھا پس انھوں نے آ کر رکوع کیا اور سجدہ کیا اس حال میں کہ جناب رسول اللہ (صلی اللہ علیہ وآلہ وسلم) قیام کی حالت میں تھے پھر یہ رکعت مکمل کر کے کھڑے ہوگئے پس جناب رسول اللہ (صلی اللہ علیہ وآلہ وسلم) نے دوسری رکعت ادا فرمائی اور انھوں نے بھی آپ کے ساتھ دوسری رکعت ادا کی پھر انھوں نے آپ کے سجدہ کے ساتھ سجدہ کیا اور پہلا گروہ جو دشمن کے سامنے تھا وہ آیا اور انھوں نے رکوع سجدہ کیا اس حال میں کہ جناب رسول اللہ (صلی اللہ علیہ وآلہ وسلم) حالت تشہد میں تھے اور دوسری جماعت بھی آپ کے ساتھ تھی پس جناب رسول اللہ (صلی اللہ علیہ وآلہ وسلم) کی دو رکعتیں ہوئی اور ہر گروہ کی بھی دو دو رکعت ہوئیں۔
تخریج : ابو داؤد فی الصلاۃ ١٢٤٠‘ نسائی فی السنن کتاب صلوۃ الخوف ١٩٣۔