Al Tahawi: Hadith 2001

٢٠٠١: جسرہ بنت دجاجہ کہتی ہیں کہ میں نے ابو ذر (رض) کو جناب نبی اکرم (صلی اللہ علیہ وآلہ وسلم) سے اسی طرح کی روایت بیان کرتے سنا۔ اس میں اس بات کی دلیل ہے کہ کسی سورة کا بعض حصہ ایک رکعت میں پڑھ لیا جائے تو اس میں کچھ حرج نہیں اور اس میں بھی کچھ حرج نہیں کہ پوری سورت ایک رکعت میں پڑھی جائے جیسا کہ جناب رسول اللہ (صلی اللہ علیہ وآلہ وسلم) سے روایات مذکور ہوئیں اور جناب رسول اللہ (صلی اللہ علیہ وآلہ وسلم) سے طول قیام کی ترغیب میں روایات آئی ہیں۔ ابوالعالیہ نے جو روایت ذکر کی ہے یہ طول ِ قیام کے منافی ہے۔ افضل ترین نماز لمبے قیام والی ہے اور یہ اس وقت تک ممکن نہیں جب تک قراءت کو کئی سورتیں پڑھ کر طویل نہ کیا جائے۔ یہ تمام امام ابوحنیفہ ابویوسف اور محمد (رح) کا قول ہے اور بن عمر (رض) سے بھی اس روایت کے خلاف روایت موجود ہے جو ہم فصل اوّل میں نقل کر آئے۔ جمع بین السورتین کی روایات یہ ہیں۔
حاصل روایات : ان روایات سے ایک رکعت میں سورة کے بعض حصہ کا پڑھنا ثابت ہوگیا اور یہ بات پہلے روایات سے ثابت کی جاچکی کہ ایک رکعت میں کئی سورتوں کے پڑھنے میں حرج نہیں ہے اور ان کے علاوہ آپ کا یہ ارشاد گرامی معروف ہے کہ افضل الصلاۃ۔۔۔
تخریج : الصلاۃ طول القیام مسلم فی الصلاۃ ١٦٤؍١٦٥۔
اس روایت نے بھی ابوالعالیہ والی روایت کی صاف صاف نفی کردی کیونکہ اس ارشاد کا مطلب یہی ہے کہ افضل نماز طویل قراءت والی ہے اور طویل قراءت تو کئی سورتوں کو جمع کرنے سے ہی ممکن ہے۔
یہی ہمارے ائمہ ابوحنیفہ ‘ ابو یوسف ‘ محمد (رح) کا قول ہے۔
فریق ثانی کی تائید میں مزید روایات : ابوالعالیہ وغیرہ والی روایات کے خلاف حضرت ابن عمر ‘ عمر ‘ تمیم داری (رض) سے روایات وارد ہیں جو ہم درج کر رہے ہیں۔