Al Tahawi: Hadith 2974

٢٩٧٤: ابو اسحاق نے حارث سے انھوں نے جناب علی (رض) سے ‘ انھوں نے نبی اکرم (صلی اللہ علیہ وآلہ وسلم) سے اسی طرح نقل کیا ہے یہ تمام روایات بھی گھوڑوں میں صدقہ فرضیہ کی نفی کرتی ہیں۔ یہ روایت بھی گھوڑوں میں زکوۃ کے لازم ہونے کے منافی ہے اگر کوئی معترض یہ کہے کہ ان کو غلاموں کے ساتھ ملا کر ذکر کیا گیا ہے اور جب غلام تجارت کے لیے ہوں تو اس وقت وجوب زکوۃ کی نفی نہیں ہوتی اسی طرح چرنے والے گھوڑوں سے بھی زکوۃ کی نفی نہیں ہوتی اور آپ کا ارشاد گرامی کہ میں نے تم سے صدقہ کو معاف کردیا یہ خدمت کے غلاموں کے ساتھ مخصوص ہے۔ اسی طرح آپ کا ارشاد تم سے گھوڑوں کا صدقہ معاف کردیا یہ سواری کے گھوڑوں کے ساتھ خاص ہے۔ اس کے جواب میں عرض کریں گے۔ اگر آپ نے جو احتمال ذکر کیا یہ بھی بجا ہے۔ جب روایت سے زکوۃ کا انتفاء باطل ہوا تو جو ہم نے سابقہ سطور میں ذکر کیا ‘ اس سے اس کی نفی ہوجائے گی اور حدیث حارثہ میں یہ واضح طور پر موجود ہے کہ حضرت علی (رض) نے حضرت عمر (رض) سے کہا کہ اگر یہ بطور فرض جزیہ یا خراج کے طور پر وصول نہ کیا جائے تو اس کے لینے میں حرج نہیں ۔ تو حضرت علی (رض) کے اس قول سے گھوڑوں کی زکوۃ کی نفی مراد ہے اگرچہ وہ چرنے والے ہوں اور حضرت ابوہریرہ (رض) سے بھی اس کے ہم معنیٰ روایت وارد ہوئی ہے ۔۔ جو کہ حدیث عاصم اور حارث کی حضرت علی (رض) سے ملتی جلتی ہے۔ روایات ذیل میں ہیں۔
اس روایت پر اشکال :
گھوڑوں اور غلاموں کو اکٹھا ذکر فرمایا گیا ہے اور غلاموں میں جب تجارت کے ہوں تو زکوۃ لازم ہے اور اس ارشاد سے ان کی نفی نہیں ہوتی تو گھوڑے جب چرنے والے ہوں تو ان کی صدقہ واجب سے نفی کس طرح ثابت ہوگی۔
ازالہ :
ہم نے تسلیم کرلیا کہ اس سے زکوۃ کی نفی نہیں ہوتی تو زکوۃ کی نفی حدیث سے ثابت ہو رہی ہے کیونکہ اس میں یہ بات واضح موجود ہے کہ حضرت علی (رض) نے عمر (رض) کو یہ بات کہی اس سے ثابت ہوا کہ علی (رض) کے ہاں جناب رسول اللہ (صلی اللہ علیہ وآلہ وسلم) کے قول کا مطلب ان سے سائمہ ہونے کے باوجود زکوۃ کی نفی تھی اور خود ابوہریرہ (رض) نے جناب نبی اکرم (صلی اللہ علیہ وآلہ وسلم) سے اسی طرح کی روایت نقل کی ہے جس کا معنی عاصم ‘ حارث عن علی (رض) والی روایت کے قریب قریب ہیں۔
وہ روایت اگلی روایت ہے۔