Al Tahawi: Hadith 327

٣٢٧: عبیداللہ بن عدی بن الخیار کہتے ہیں اصحاب رسول اللہ (صلی اللہ علیہ وآلہ وسلم) نے عمر (رض) کے پاس غسل جنابت کے سلسلہ میں باہمی مذاکرہ کیا بعض نے اذا جاوز الختان الختان فقد وجب الغسل سے غسل کو لازم کہا جبکہ دوسروں نے ” انما الماء من المائ “ سے عدم وجوب بتلایا۔ حضرت عمر (رض) کہنے لگے چنے ہوئے اہل بدر جب تم میرے سامنے یہ اختلاف کر رہے ہو تو تمہارے علاوہ لوگوں کا حال کیا ہوگا اس پر علی بن ابی طالب (رض) نے کہا اے امیرالمؤمنین ! اگر آپ اس مسئلہ کی حقیقت جاننا چاہتے ہیں تو ازواج النبی (صلی اللہ علیہ وآلہ وسلم) سے اس سلسلہ میں پیغام بھیج کر دریافت کرلیں تو حضرت عمر (رض) نے حضرت عائشہ (رض) کی طرف پیغام بھیج کر دریافت کیا تو انھوں نے فرمایا جب ختان ختان کی طرف تجاوز کر جائے تو غسل واجب ہوجاتا ہے اس پر عمر (رض) نے کہا میں جس کسی کو الماء من الماء کہتا سنوں گا میں اس کو سزا دوں گا۔ پھر یہ حضرت عمر (رض) ہیں جنہوں نے صحابہ کرام (رض) کے سامنے لوگوں کو اس بات پر آمادہ کیا اور ان میں سے کسی ایک نے بھی انکار نہیں کیا اور رہا ررفاعہ کا قول الماء من الماء تو اس میں یہ احتمال ہے کہ عمر (رض) نے اس کو قبول نہیں کیا کیونکہ اس میں یہ احتمال ہے کہ اس کو ابن عباس (رض) والی روایت پر محمول کریں جب وہ حضرات اس بات کو ثابت نہ کرسکے تو آپ نے ان کی بات کو چھوڑ دیا اور آپ نے اسی بات کو اختیار کیا جو کہ آپ کی اور باقی صحابہ کرام (رض) کی رائے تھی اور دیگر صحابہ (رض) سے بھی اس سلسلے میں آپ کی موافقت مروی ہے۔
تتمہ دلیل :
یہ حضرت عمر (رض) جو اصحاب رسول اللہ (صلی اللہ علیہ وآلہ وسلم) کی موجودگی میں وجوب غسل کا قول کر رہے ہیں اور اس پر کسی نے انکار نہیں کیا یہ اجماع صحابہ کی کافی دلیل نہیں رہا معاملہ رفاعہ (رض) والی روایت الماء من الماء تو وہ دو احتمال رکھتی ہے ایک وہ جس پر رفاعہ (رض) نے محمول کیا مگر عمر (رض) نے اس کو قبول نہ کیا بلکہ عائشہ (رض) والی روایت کو اختیار کیا دوسرا احتمال یہ ہے کہ یہ احتلام پر محمول ہے اور ختان والی روایت خاص اس موضوع سے متعلق ہے جب رفاعہ (رض) اپنی روایت سے وہ مفہوم ثابت نہ کرسکے تو پھر عمر (رض) دیگر تمام اصحاب رسول اللہ (صلی اللہ علیہ وآلہ وسلم) نے وجوب غسل کو بالاجماع لازم قرار دیا۔