Al Tahawi: Hadith 3554

٣٥٥٤: نافع نے ابن عمر (رض) سے انھوں نے جناب رسول اللہ (صلی اللہ علیہ وآلہ وسلم) سے اسی طرح کی روایت نقل کی ہے جو ہم اس باب کے شروع میں ذکر کر آئے مگر اس میں یہ اضافہ موجود ہے۔ ” الا ان یکون غسیلًا “ تو جو کچھ ہم نے ذکر کیا اس سے ثابت ہوا کہ جناب رسول اللہ (صلی اللہ علیہ وآلہ وسلم) نے ورس اور زعفران سے رنگے ہوئے کپڑے سے دھلے ہوئے کپڑے کو مستثنیٰ فرمایا۔ امام ابوحنیفہ ‘ ابو یوسف ‘ محمد رحمہم اللہ کا یہی قول ہے۔ متقدمین کی ایک جماعت سے بھی یہ قول مروی ہے۔ ذیل میں ملاحظہ ہو۔
تحقیق : ابن ابی عمران کہتے ہیں کہ میں نے یحییٰ بن معین کو دیکھا کہ وہ حمانی سے تعجب کر رہے تھے جبکہ وہ اس روایت کو بیان کررہا تھا تو عبدالرحمن بن صالح ان کو کہنے لگے یہ روایت تو میرے پاس بھی موجود ہے پھر فوراً اٹھ کر گئے اور اپنے اصل مخطوطہ کو لے آئے اور اس سے یہ حدیث نکال کر ان کو دکھائی جس کی سند یہ تھی۔ یحیٰی حمانی عن ابی معاویہ الی آخر الحدیث تو یحییٰ بن معین نے اس سے یہ روایت لکھ لی۔
تخریج : مسند احمد ٢؍٤١۔
اس روایت سے جناب رسول اللہ (صلی اللہ علیہ وآلہ وسلم) ورس و زعفران والے دھوئے ہوئے کپڑے کو مستثنیٰ کرنا ثابت ہوگیا۔
یہی قول امام ابوحنیفہ ‘ ابو یوسف ‘ محمد رحمہم اللہ کا ہے۔