Al Tahawi: Hadith 3660

٣٦٦٠: ہشام شعبہ دونوں نے قتادہ سے انھوں نے انس (رض) سے روایت نقل کی ہے انھوں نے جناب نبی اکرم (صلی اللہ علیہ وآلہ وسلم) سے اسی طرح روایت کی ہے۔ امام طحاوی کہتے ہیں کہ جب ایک آدمی تمتع یا قران کی ھدی روانہ کرے تو وہ اس پر سواری کرسکتا ہے اس قول کو علماء کی ایک جماعت نے اختیار کیا ہے۔ اور انھوں نے اس سلسلہ میں ان آثار کو بطور دلیل کے پیش کیا۔ اور دیگر حضرات نے ان سے اختلاف کرتے ہوئے کہا یہ جناب نبی اکرم (صلی اللہ علیہ وآلہ وسلم) کی طرف سے اس آدمی کی شدید حاجت کو دیکھ کر خاص اجازت تھی اور اس کو یہ حکم دیا اور ہم بھی اسی طرح کہتے ہیں کہ ضرورت کے وقت اس پر سواری کرنے میں کچھ حرج نہیں مگر دوسری سواری کی موجودگی میں یہ درست نہیں ہے پس اس روایت میں یہ احتمال پیدا ہوگیا کہ یہ حکم آپ نے ضرورت کے پیش نظر دیا جیسا کہ دوسرے قول والوں نے کہا ہے اور یہ بھی احتمال ہے کہ ضرورت کی وجہ سے نہ ہو ۔ لیکن تمام ہدیا کے جانوروں کا حکم ہے کہ ضرورت کے وقت ان پر سواری کی جاسکتی ہے۔ پس اب ہم اس میں غور کرتے ہیں۔
ان روایات میں ہدی پر سواری کا آپ حکم فرما رہے ہیں جس سے ثابت ہوتا ہے کہ سوار ہونے میں کوئی حرج نہیں خواہ ضرورت ہو یا نہ ہو۔
فریق ثانی کا مؤقف :
ہدی کے جانور پر سواری بلاضرورت ناجائز ہے ضرورت شدیدہ ہو تو تب جائز ہے۔ اور اگر سوار ہونے سے جانور کو نقصان ہوا تو اس کا ضمان لازم ہوگا۔
سابقہ مؤقف کا جواب :
ان روایات میں جس شخص کو آپ نے سواری کا حکم دیا وہ ضرورۃً ہے۔ ضرورت کو عام قانون کے طور پر استعمال نہیں کرسکتے۔ اور یہ بھی ہوسکتا ہے کہ ضرورت کی خاطر نہ ہو۔ اب اس کے لیے روایات پر نظر ڈالتے ہیں کہ وہ کس جانب کی تصدیق کرتی ہیں۔