Al Tahawi: Hadith 3790

٣٧٩٠: سالم وعطاء بیان کرتے ہیں کہ ابن عمر (رض) صبح کے بعد طواف کرتے اور عصر کے بعد ایک ہفتہ طواف کرتے اور جب تک نماز کا وقت ہوتا طواف کی دو رکعت ادا کرتے یہ عطاء ہیں انھوں نے یہ اپنے اجتہاد سے کہا جو ہم نے بیان کیا ہے حالانکہ انھوں نے ابن عباس (رض) سے فصل اول میں روایت نقل کی ہے۔ جو اس کے خلاف ہے مگر ان کی رائے اس کے خلاف تھی جس کا اظہار انھوں نے مندرجہ بالا اثر میں کردیا۔
نظر طحاوی (رح) :
جناب رکعات طواف کے سلسلہ میں اختلاف ہوا تو ہم نے اس کو پاٹنے کے لیے غور کیا کہ طلوع آفتاب اور غروب آفتاب اور نصف النہار ‘ فوت شدہ نمازوں کو ادائیگی سے روک دیتے ہیں اور جناب رسول اللہ (صلی اللہ علیہ وآلہ وسلم) کا طریقہ نماز فجر کی قضا میں یہی منقول ہے کہ آپ ارتفاع آفتاب تک رکے رہے جب قضا فرائض ممنوع ہوئے تو طواف کی رکعات بدرجہ اولیٰ ممنوع ہوں گی اور عقبہ بن عامر (رض) کی روایت تین اوقات کے متعلق گزر چکی کہ جناب رسول اللہ (صلی اللہ علیہ وآلہ وسلم) نے ان میں نماز پڑھنے اموات کو دفن کرنے (نمازِ جنازہ پڑھنا مراد ہے کیونکہ نماز کے بعد دفن ہوگا) جبکہ سورج طلوع ہو رہا ہو یہاں تک کہ بلند ہوجائے اور جب دوپہر کا وقت یہاں تک کہ زوال ہوجائے اور جب سورج غروب کی طرف جھک رہا ہو یہاں تک کہ غروب ہوجائے۔ (مسلم فی المسافرین ٢٩٣) گزشتہ صفحات میں اوقات مکروہ کے باب میں یہ روایت ذکر ہوچکی۔
جب ان تین اوقات میں نماز جنازہ سے بھی روک دیا گیا تو طواف کی رکعات بھی لازماً ممنوع ہوں گی اسی طرح عصر کے بعد اصفرار آفتاب سے پہلے نماز اور صبح کے بعد طلوع آفتاب سے پہلے نماز۔ ان دو اوقات میں نوافل کی ممانعت کردی گئی مگر جنائز کو مباح کردیا گیا اور فوت شدہ نمازوں کو بھی مباح قرار دیا گیا طواف کی رکعات نفل نہیں بلکہ واجب ہیں۔ یہاں تک کہ ان کا وجوب نماز جنازہ کی طرح ہے۔ پس نظر کا تقاضا یہ ہے کہ وجوب کے بعد ان کا حکم فرائض کی طرح ہو جو کہ لازم ہیں اور نماز جنازہ کی طرح ہو جو کہ واجب و لازم ہے۔ پس نماز طواف ہر اس وقت میں پڑھی جاسکتی ہے جس میں جنازہ جائز ہوسکتا ہے اور فوت شدہ نماز قضاء کی جاسکتی ہے اور ان اوقات میں نہیں پڑھ سکتے جن میں نہ جنازہ پڑھ سکتے ہیں اور نہ نماز فائتہ ادا ہوسکتی ہے نظر کا یہی تقاضا ہے اس کو عطاء ابراہیم و مجاہد نے اختیار کیا اور ابن عمر (رض) کا قول ہے اور ہمارا اپنا رجحان بھی یہی ہے اور سفیان ثوری کا قول یہی ہے اور یہ ائمہ احناف کے قول کے خلاف ہے ہمارے متاخرین علماء میں علامہ عبدالحی (رح) نے بھی اسی کو اختیار کیا ہے۔
امام طحاوی (رح) نے اب تک جہاں اپنا رجحان ظاہر کیا وہاں صرف اشارہ اور کنایہ استعمال کیا مگر یہ پہلا موقعہ ہے کہ انھوں نے ” الیہ تذہب “ کہہ کر اپنے رجحان کی ترجمانی کی۔ کعات طواف کا وجوب بھی اسی کا متقاضی ہے۔