Al Tahawi: Hadith 3899

٣٨٩٩: حسن عرنی نے ابن عباس (رض) سے روایت نقل کی ہے کہ ہم مزدلفہ سے لوٹے۔ جب ہم منیٰ سے روانہ ہونے لگے تو جناب رسول اللہ (صلی اللہ علیہ وآلہ وسلم) نے فرمایا طلوع آفتاب سے پہلے رمی مت کرو۔ اس روایت میں جناب رسول اللہ (صلی اللہ علیہ وآلہ وسلم) نے صبح کے وقت کی وضاحت فرمائی جس میں ان کو کنکریاں مارنے کی اجازت مر حمت فرمائی تھی اور ہم اس روایت کو اسی فصل میں پہلے ذکر کر آئے اور وہ وقت طلوع آفتاب کے بعد کا وقت ہے۔ پس یہ روایت شعبہ مولیٰ ابن عباس (رض) کی روایت سے اولیٰ ہے کیونکہ یہ جناب نبی اکرم (صلی اللہ علیہ وآلہ وسلم) سے تواتر کے ساتھ ثابت ہے کہ آپ نے ان کو مذکورہ بات کا حکم فرمایا اور مزدلفہ سے واپسی کا اجازت نامہ تو کمزور لوگوں کے لیے تھا تاکہ بھیڑ بھاڑ سے بچ جائیں ۔ پس منی میں پہنچ جانے کے بعد ان کو لوگوں کے پہنچنے سے پہلے طلوع آفتاب کے بعد کنکریاں مارنا ممکن ہوجاتا ہے۔ جب طاقت ور آجائیں تو پھر ضعفاء کو کنکریاں مارنا ممکن نہیں رہتا اور طاقتور لوگ طلوع کے بعد آتے ہیں اور یہ وقت تو طلوع آفتاب سے پہلے کا ہے۔ آپ (صلی اللہ علیہ وآلہ وسلم) نے ان کو اسی طرح حکم فرمایا۔
نوٹ : اس سے معلوم ہوا کہ اس الاصباح سے مراد جس میں رمی کا حکم فرمایا وہ طلوع آفتاب کے بعد کا وقت ہے۔
تخریج : بخاری فی الحج باب ١٠٠‘ مسلم فی المساجد ٢٨٧‘ ابو داؤد فی المناسک باب ٤‘ ترمذی فی الحج باب ٥٨؍٦٠‘ نسائی فی الحج باب ٢١٣۔
نوٹ : اس روایت سے معلوم ہوتا ہے کہ صبح سے مراد طلوع آفتاب ہے یہ روایت شعبہ مولیٰ ابن عباس (رض) کی روایت سے اولیٰ ہے کیونکہ امر رسول اللہ (صلی اللہ علیہ وآلہ وسلم) کے ساتھ یہ بات ابن عباس (رض) سے تواتر سے پہنچی ہے۔
نمبر 2: کمزوروں کو تو رات لوٹنے کی اس لیے اجازت مرحمت فرمائی تاکہ وہ لوگوں کی بھیڑ سے بچ جائیں جب وہ رات کو منیٰ پہنچ چکیں گے تو وہ جمرہ عقبہ کی رمی لوگوں کے پہنچنے سے پہلے کرلیں گے کیونکہ لوگوں کی آمد پر ان کو رمی ممکن نہیں۔ یہ ضعفاء کے علاوہ دوسروں کے لیے نہیں کیونکہ وہ تو طلوع آفتاب سے پہلے لوٹیں گے ان کو جناب رسول اللہ (صلی اللہ علیہ وآلہ وسلم) نے اسی طرح حکم فرمایا۔ یہ روایات اس کی دلیل ہیں۔