Al Tahawi: Hadith 3932

٣٩٣٢: عبیداللہ بن عبداللہ نے ابن عباس (رض) سے روایت کی ہے۔ اسامہ بن زید (رض) جناب نبی اکرم (صلی اللہ علیہ وآلہ وسلم) کے پیچھے بیٹھے تھے جبکہ آپ (صلی اللہ علیہ وآلہ وسلم) عرفات سے مزدلفہ تشریف لے جا رہے تھے۔ پھر آپ نے فضل بن عباس (رض) کو مزدلفہ سے منیٰ تک پیچھے بٹھا لیا۔ دونوں نے بتلایا کہ جناب رسول اللہ (صلی اللہ علیہ وآلہ وسلم) جمرہ عقبہ کی رمی تک تلبیہ کہتے رہے۔ جناب رسول اللہ (صلی اللہ علیہ وآلہ وسلم) سے یہ ثابت ہو رہا ہے کہ جمرہ عقبہ کو کنکریاں مارنے تک آپ تلبیہ پڑھتے رہے اور یہ روایات صحیح و درست ہیں اور وہ روایات جو شروع باب میں آئی ہیں اور ہم نے ان کی وضاحت کی ہے۔ وہ اس کے خلاف نہیں ۔ یہ فضل بن عباس (رض) ہیں جو کہ جناب رسول اللہ (صلی اللہ علیہ وآلہ وسلم) کے پیچھے سوار تھے جب کہ آپ عرفات سے روانہ ہوئے۔ انھوں نے جناب رسول اللہ (صلی اللہ علیہ وآلہ وسلم) کو عرفات کے اس موقعہ پر اور بعد میں بھی تلبیہ کہتے سنا اور ہم نے حضرت اسامہ (رض) کی روایت نقل کی ہے کہ میں عرفات میں جناب رسول اللہ (صلی اللہ علیہ وآلہ وسلم) کی سواری پر پیچھے بیٹھا ہوا تھا اور آپ اس وقت صرف تکبیر و تہلیل کہہ رہے تھے اور عرفہ کے بعد آپ کا تلبیہ کہنا اس بات کی دلیل ہے کہ آپ عرفات میں بھی تلبیہ کہہ سکتے تھے اور آپ کا عرفات میں تکبیر و تہلیل اسی طرح تھا جیسا کہ آپ سے پہلے کہتے تھے ایسا نہیں کہ آپ نے تکبیر و تہلیل تلبیہ کی جگہ کہی۔ کیا تم دیکھتے کہ وہ فرماتے ہیں جناب رسول اللہ (صلی اللہ علیہ وآلہ وسلم) جمرہ عقبہ کی کنکریاں مارنے تک تلبیہ کہتے رہے۔ البتہ بعض اوقات درمیان میں تکبیر و تہلیل کہتے تھے۔ تو اس میں حضرت عبداللہ (رض) نے اس بات کی اطلاع دی ہے کہ جناب رسول اللہ (صلی اللہ علیہ وآلہ وسلم) کبھی تکبیر کو تہلیل سے ملا دیتے تھے اور یہ اس بات کی دلالت نہیں کہ اس وقت میں تلبیہ نہیں ہے اور تلبیہ کا وجود یہ ثابت کرتا ہے کہ یہ تلبیہ کا وقت ہے۔ پس ان آثار کی تصحیح سے معلوم ہوگیا کہ یوم نحر کو جمرہ عقبہ کنکریاں مارنے تک تلبیہ کا وقت ہے۔ اگر کوئی معترض کہے کہ اصحاب رسول اللہ (صلی اللہ علیہ وآلہ وسلم) سے ان روایات کے خلاف روایات بھی وارد ہیں جو ذیل میں درج ہیں۔
تخریج : بخاری فی الحج باب ٢٢‘ ٩٣‘ ٩٩‘ ١٠١‘ مسلم فی الحج ٢٦٦؍٢٦٧‘ ترمذی فی الحج باب ٧٨‘ نسائی فی المناسک باب ٢٠٤؍٢٢٩‘ ابن ماجہ فی المناسک باب ٦٩‘ دارمی فی المناسک باب ٦٠‘ مسند احمد ١؍١١٤‘ ٢١٠؍٢١٤‘ ٢٢٦۔
حاصل روایات : ان آثار سے ثابت ہو رہا ہے کہ آپ (صلی اللہ علیہ وآلہ وسلم) نے جمرہ عقبہ کی رمی تک تلبیہ کہا سابقہ روایات فصل اول اس کے خلاف نہیں کیونکہ ان میں تہلیل و تکبیر کا تذکرہ ہے۔ اور وہ تلبیہ کے خلاف نہیں جیسا پہلے ذکر کر آئے۔ یہ فضل (رض) جناب رسول اللہ (صلی اللہ علیہ وآلہ وسلم) کے مزدلفہ سے منیٰ واپسی تک ردیف تھے وہ بھی عرفہ سے بعد تلبیہ کو بیان کر رہے ہیں۔ اور اسامہ (رض) کی روایت عرفات میں تلبیہ کو ثابت کرتی ہے۔ کبھی آپ تلبیہ کبھی تہلیل اور کبھی تکبیر کہتے تھے یہ نہیں کہ تلبیہ کی جگہ تہلیل و تکبیر کہتے تھے۔ بلکہ ابن مسعود (رض) کی روایت میں اور صاف فرمایا کہ آپ (صلی اللہ علیہ وآلہ وسلم) تکبیر و تہلیل سے ملا کر اور کبھی الگ تلبیہ رمی جمرہ عقبہ تک کرتے رہے۔ معلوم ہوا کہ یہ تمام وقت تلبیہ تکبیر و تہلیل کا ہے۔
پس ثابت ہوگیا کہ جمرہ عقبہ کی رمی تک تلبیہ کہنا چاہیے۔
سرسری اشکال :
بعض صحابہ کرام (رض) کا عمل اس کے خلاف معلوم ہوتا ہے جیسا کہ یہ روایات ذکر کی جا رہی ہیں۔