Al Tahawi: Hadith 4073

٤٠٧٣: سعید مقبری نے ابو شریح خزاعی (رض) سے روایت کی ہے جب عمرو بن سعید نے ایک دستہ عبداللہ بن زبیر (رض) سے لڑائی کے لیے بھیجا تو ابو شریح (رض) خود عمرو بن سعید کے پاس گئے اور جو جناب رسول اللہ (صلی اللہ علیہ وآلہ وسلم) سے سنا تھا وہ اس کو سنایا پھر اپنی قوم کی مجلس میں آ بیٹھے تو میں ان کے پاس اٹھ کر گیا اور ان کے پاس بیٹھ گیا چنانچہ انھوں نے مجھے وہی روایت سنائی جو عمرو بن سعید کو سنائی اور وہ بھی بتلایا جو عمرو نے جواب دیا اور کہنے لگے ہم جناب رسول اللہ (صلی اللہ علیہ وآلہ وسلم) کے اس وقت ساتھ تھے جب مکہ فتح ہوا جب فتح مکہ سے اگلا دن آیا تو آپ (صلی اللہ علیہ وآلہ وسلم) نے ہمیں خطبہ دیا اور فرمایا اے لوگو ! اللہ تعالیٰ نے مکہ کو حرمت والا بنایا جب سے آسمان و زمین کو پیدا کیا وہ اللہ تعالیٰ کے محترم مقامات سے ہے جو قیامت تک محترم رہیں گے۔ کسی شخص کو جائز نہیں جو اللہ تعالیٰ اور آخرت پر یقین رکھتا ہو۔ کہ وہ اس میں کوئی خون بہائے اور نہ یہ جائز ہے کہ کوئی درخت کاٹے۔ اور مجھ سے پہلے کسی کے لیے حلال نہیں فرمایا اور میرے بعد بھی کسی کے لیے حلال نہیں اور میرے لیے بھی صرف ایک گھڑی کے لیے حلال فرمایا اور اس کا سبب اہل مکہ مشرکین پر غضب کا اظہار تھا۔ خبردار سنو ! پھر اس کی حرمت پہلے کی طرح واپس لوٹ آئی ہے جو شخص تمہیں کہے جناب رسول اللہ (صلی اللہ علیہ وآلہ وسلم) نے اس کو حلال کیا تو اس کو یہ جواب دو بلاشبہ اللہ تعالیٰ نے اپنے رسول اللہ (صلی اللہ علیہ وآلہ وسلم) کے لیے اس کو حلال کیا ہے اس کو تیرے لیے حلال نہیں کیا۔ سعید کہتے ہیں ابو شریح کہنے لگے میری بات سن کر عمرو بن سعید کہنے لگا اے بوڑھے ! تم لوٹ جاؤ ہم تیری نسبت اس کی حرمت سے زیادہ واقف ہیں یہ خون بہانے والے سے نہیں روکتا اور نہ خون خرابہ کرنے والے سے روکتا ہے اور نہ امیر کی اطاعت سے نکلنے والے سے روکتا ہے میں نے کہا میں موجود تھا تو غائب تھا ہمیں جناب رسول اللہ (صلی اللہ علیہ وآلہ وسلم) نے غائب کو پہنچانے کا حکم فرمایا تھا اور وہ میں نے پہنچا دیا۔
تخریج : بخاری فی اعلم باب ٣٧‘ والعید باب ٨؍١٠‘ والمغازی باب ٥١‘ مسلم فی الحج ٤٤٦‘ ترمذی فی الحج باب ١‘ نسائی فی المناسک باب ١١١‘ مسند احمد ٤‘ ٣١؍٣٢۔
لغات : سافک۔ خون بہانے والا۔ خربہ۔ خرابی والا۔ خالع۔ بیعت توڑنا۔