Al Tahawi: Hadith 951

٩٥١: ابن جابر نے نافع سے روایت نقل کی کہ میں عبداللہ بن عمر (رض) کے ساتھ نکلا وہ اپنی زمینوں پر جا رہے تھے پس ہم نے ایک منزل پر قیام کیا تو ان کے پاس ایک آدمی آیا اور کہنے لگا صفیہ بنت ابی عبید سخت تکلیف میں ہے اور میرے خیال میں آپ کے پہنچنے تک وہ چل بسے گی پس آپ تیزی سے روانہ ہوئے اس وقت آپ کے ساتھ ایک قریشی آدمی تھا ہم چلتے رہے یہاں تک کہ جب سورج غروب ہوگیا تو انھوں نے نماز مغرب ادا نہ فرمائی اور میں نے ملاقات سے اب تک ان کو نمازوں کا محافظ پایا تھا جب زیادہ دیر کی تو میں نے کہا اللہ تعالیٰ آپ پر رحم فرمائے نماز کا وقت ہے میری طرف توجہ فرمائی مگر حسب سابق چلتے رہے یہاں تک کہ جب شفق کا آخری وقت ہونے لگا تو اترے اور مغرب کی نماز ادا کی پھر کچھ دیر کے بعد عشاء کی نماز ادا کی اور اس وقت شفق بالکل غائب ہوچکا تھا پھر ہماری طرف متوجہ ہو کر فرمایا جناب رسول اللہ (صلی اللہ علیہ وآلہ وسلم) کو جب سفر میں جلدی ہوتی تو آپ اسی طرح کرتے۔
تخریج : ابو داؤد فی الصلاۃ باب ٥‘ نمبر ١٢١٢‘ نسائی فی المواقیت باب ٤٨۔