١٠٣٩: محمد بن المنکدر نے جابر سے اور انھوں نے حضرت ابوبکر الصدیق (رض) سے اور انھوں نے حضرت بلال (رض) سے اور انھوں نے جناب نبی اکرم (صلی اللہ علیہ وآلہ وسلم) سے اسی طرح کی روایت نقل کی ہے۔ امام طحاوی (رح) فرماتے ہیں ان روایات میں فضیلت کا موقع بتلایا گیا اور وہ فجر کی خوب روشنی ہے پہلی دونوں فصلوں کی روایات میں صرف جناب رسول اللہ (صلی اللہ علیہ وآلہ وسلم) کے اس وقت کو بتلایا گیا ہے جس میں آپ (صلی اللہ علیہ وآلہ وسلم) نماز پڑھتے تھے۔ پس یہ کہنا درست ہے کہ کبھی آپ (صلی اللہ علیہ وآلہ وسلم) اندھیرے میں پڑھتے اور کبھی امت پر وسعت کے لیے کبھی خوب سپیدے میں پڑھتے ‘ فضیلت پر دلالت کرنے والی حدیث حدیث رافع ہے تاکہ آپ (صلی اللہ علیہ وآلہ وسلم) سے مروی آثار میں تضاد نہ رہے۔ روایات کے لحاظ سے اس باب کی یہی صورت ہے ‘ تابعین (رح) کے اقوال آ رہے ہیں۔
تخریج : بیہقی فی دلائل النبوۃ ٦؍٢٢٤۔
حاصل روایات : ان چھ روایات سے فجر کے اسفار میں پڑھنے کی افضلیت ثابت ہو رہی ہے اب رہی غلس اور اسفار والی مطلق روایات تو اس میں نماز کے مطلق وقت کو ذکر کیا گیا ہے کہ ان میں سے جس میں پڑھ لیا جائے درست ہے جیسا کہ فعل رسول اللہ (صلی اللہ علیہ وآلہ وسلم) سے اس کا ثبوت مل رہا ہے اور یہ بھی کہہ سکتے ہیں کہ امت پر وسعت کے لیے بھی آپ غلس اور کبھی اسفار میں نماز ادا فرماتے تھے۔ اور افضل دونوں میں سے وہی ہے جس کو حدیث رافع بن خدیج میں ذکر کیا گیا ہے اس سے آثار میں تضاد کی گنجائش نہیں رہتی۔