١٠٦٣: جبیر بن نفیر کہتے ہیں کہ ہمیں حضرت معاویہ (رض) نے صبح کی نماز غلس میں پڑھائی تو ابوالدردائ (رض) نے کہا اس نماز کو اسفار میں پڑھو یہ زیادہ یاد آخرت دلانے والی ہے تم چاہتے ہو کہ جلدی سے حوائج دنیا میں مصروفیت اختیار کریں۔ ہمارے نزدیک حضرت ابوالدرداء (رض) نے ان پر یہ اعتراض اسی وجہ سے کیا کہ انھوں نے روشنی تک قراءت کو لمبا نہیں کیا اندھیرے میں شروع کرنے پر اعتراض نہ تھا جب رسول اللہ (صلی اللہ علیہ وآلہ وسلم) کے صحابہ (رض) سے روایات ہم نے ذکر کردیں کہ وہ سپیدے میں نماز سے فارغ ہوتے اور یہ بھی روایت کردیا کہ وہ اس میں لمبی قراءت کرتے تو اس سے یہ ثابت ہوگیا کہ نماز صبح کو سپیدے میں چھوڑنا یہ کسی کے مناسب نہیں اندھیرے میں پڑھنا اس وقت ہے جب اس کے ساتھ اسفار ہو گویا اندھیرا نماز کی ابتداء میں اور اسفار اس کے اختتام میں تھا اگر کوئی یہ اعتراض کرے کہ حضرت عائشہ صدیقہ (رض) کی روایت کا کیا مطلب ہے کہ وہ عورتوں کے لوٹنے کو بیان کرتے ہوئے فرماتی ہیں : ” وما یعرفن من الغلس “ کہ وہ اندھیرے کی وجہ سے پہچانی نہیں جاتی تھیں تو اس کے جواب میں یہ کہا جائے گا کہ عین ممکن ہے کہ یہ طویل قراءت کے حکم سے پہلے کا حکم ہو جیسا کہ اس روایت میں ہے۔
علامہ طحاوی (رح) فرماتے ہیں : ابوالدردائ (رض) کا یہ نکیر فرمانا ہمارے نزدیک اسی وجہ سے تھا کہ انھوں نے قراءت کو طویل نہ کیا تھا آپ کا مقصد یہ تھا کہ قراءت کو طویل کرو تاکہ اسفار میں داخل ہوجاؤ یہ مطلب نہ تھا کہ تم غلس میں کیونکر نماز ادا کرتے ہو واللہ اعلم۔
حاصل روایات : اصحاب رسول اللہ (صلی اللہ علیہ وآلہ وسلم) سے جو روایات ہم نے نقل کی ہیں ان میں نماز سے انصراف کا وقت اسفار بتلایا گیا ہے اور اس کے ساتھ ان روایات میں طویل قراءت کا واضح ثبوت ملتا ہے اس سے یہ بات ثابت ہوگئی کہ اسفار کے وقت نماز فجر سے فراغت ضروری ہے اس کا ترک کسی کو مناسب نہیں اور تغلیس اس صورت میں اختیار کی جائے جبکہ اس کے ساتھ اسفار ہو گویا غلس سے ابتداء اور اسفار میں انتہا ہو۔
روایت حضرت عائشہ (رض) سے اشکال :
ان النساء کن یصلین الحدیث : حضرت عائشہ (رض) فرماتی ہیں کہ عورتیں صبح کی نماز جناب نبی اکرم (صلی اللہ علیہ وآلہ وسلم) کے ساتھ ادا کر کے جب لوٹتیں تو غلس کی وجہ سے پہچانی نہ جاتی تھیں۔
الجواب عن الطحاوی (رح) :
ممکن ہے کہ یہ طویل قراءت کا حکم ملنے سے پہلے کی روایت ہو جیسا مندرجہ ذیل روایت سے معلوم ہو رہا ہے۔