١٠٦٥: عیسیٰ بن یونس نے اعمش سے انھوں نے ابراہیم سے نقل کیا کہ اصحاب رسول اللہ (صلی اللہ علیہ وآلہ وسلم) کا جس قدر اتفاق خوب روشنی میں نماز فجر پڑھنے کا ہے اور کسی چیز پر اس قدر تفاق رائے نہ ملی۔ ہمارے نزدیک (واللہ اعلم) یہ جائز نہیں کہ صحابہ کرام (رض) کسی ایسی بات کی مخالفت پر اتفاق کرلیں کہ جس عمل کو رسول اللہ (صلی اللہ علیہ وآلہ وسلم) نے کیا ہو مگر اس صورت میں کہ ان کو اس کے خلاف عمل سے اس کے منسوخ ہونے کا عمل نہ پہنچا ہو پس نماز فجر میں مُنہ اندھیرے داخل ہونا اور سپیدے میں اس سے نکلنا رسول اللہ (صلی اللہ علیہ وآلہ وسلم) کے ارشاد اور صحابہ کرام (رض) کے اقوال کے موافق ہے یہی امام ابوحنیفہ ‘ ابو یوسف اور امام محمد (رح) کا قول ہے۔
تخریج : ابن ابی شیبہ ١؍٣٨٤۔
ابراہیم نخعی نے اس بات پر اجماع نقل کیا کہ وہ اسفار میں پڑھتے تھے یہ اجماع تبھی ہوسکتا ہے جبکہ نسخ کا ثبوت ملے اور اس کے خلاف کا ثبوت پختہ ہو۔
پس مناسب یہ ہے کہ فجر کی نماز میں تغلیس میں داخل ہوں اور اسفار میں فارغ ہوں یہ جناب رسول اللہ (صلی اللہ علیہ وآلہ وسلم) اور صحابہ کرام (رض) کے ارشادات کے موافق ہے۔
تسامح طحاوی :
اس موقعہ پر اپنے راجح قول کو ائمہ ثلاثہ کی طرف نسبت کرنے میں امام طحاوی سے تسامح ہوا ہے حالانکہ ائمہ ثلاثہ کا مسلک وہی ہے جو نمبر : ٢ میں مذکور ہوا۔
یہ پہلا موقعہ ہے کہ یہ باب نظر طحاوی سے خالی ہے نیز یہ تسامح کا تیسرا موقعہ ہے اسی لیے کہا جاتا ہے کہ انسانوں میں صرف انبیاء (علیہم السلام) معصوم ہیں۔