١١٠٨: ابوالابیض نے حضرت انس بن مالک (رض) سے بیان کیا کہ جناب رسول اللہ (صلی اللہ علیہ وآلہ وسلم) ہمیں عصر کی نماز پڑھاتے جبکہ سورج کی دھوپ ابھی سفید ہوتی پھر میں اپنے قبیلہ میں جاتا اور وہ مدینہ کی ایک جانب میں آباد تھے میں ان کو کہتا کہ اٹھ کر نماز ادا کرلو جناب رسول اللہ (صلی اللہ علیہ وآلہ وسلم) نماز ادا فرما چکے۔ حضرت انس (رض) سے وارد روایات مختلف ہیں۔ چنانچہ عاصم بن عمر والی روایت جلدی پڑھنے کو بتلاتی ہے کیونکہ اس روایت میں یہ ہے : ((ان رسول اللہ ا کان یصلیھا )) کہ نماز پڑھنے والا نماز پڑھ کر اس جگہ پہنچ جاتا جس کا انھوں نے روایت میں تذکرہ کیا اور ان کو اس حال میں پاتا کہ ابھی انھوں نے عصر کی نماز ادا نہیں کی اور یہ بات تو ہم بخوبی جانتے ہیں کہ وہ سب نماز کو سورج کے زرد ہونے سے پہلے پہلے پڑھ لیتے تھے تو جلدی ادا کرنے کی دلیل بن گئی۔ رہی وہ روایت جس کو زہری نے ان سے روایت کیا ہے کہ ہم حضور (صلی اللہ علیہ وآلہ وسلم) کے ساتھ نماز عصر ادا کرتے پھر عوالی مدینہ میں پہنچتے جبکہ سورج ابھی بلند ہی ہوتا تو اس کے متعلق یہ کہنا بھی درست ہے کہ سورج زرد ہو کر غروب کے مقام سے بلند ہو اور دوسری بات یہ ہے کہ حضرت انس (رض) کی یہ روایت مضطرب ہے کیونکہ زہری نے اسحق ‘ عاصم اور ابو الابیض کے خلاف روایت نقل کی ہے اور یہ روایت حضرت انس (رض) کے علاوہ سے بھی آئی ہے۔
حاصل روایات : ان آٹھ روایات بالا سے تعجیل عصر کا ثبوت ملتا ہے حضرت انس (رض) کے شاگرد عاصم بن عمر ‘ اسحاق بن عبداللہ ‘ ابوالابیض کی روایات میں یہ بات مذکور ہے کہ انس (رض) فرماتے ہیں کہ آپ (صلی اللہ علیہ وآلہ وسلم) نماز پڑھ لیتے تو جانے والا عوالی میں جاتا اور ان کو اس حالت میں پاتا کہ ابھی تک انھوں نے نماز عصر نہ پڑھی ہوتی اور یہ تو ہم جانتے ہیں وہ آفتاب کی زردی سے پہلے نماز عصر ادا کرتے تھے اس سے ثابت ہوا کہ وہ عصر میں تعجیل فرماتے البتہ زہری کی روایت میں ہے کہ عوالی میں آتے جبکہ ابھی سورج بلند ہوتا تو عین ممکن ہے کہ اصفرار کی حالت میں بلندی مراد ہو اگر یہ معنی لیں تو پھر یہ روایت دیگر روایات کے خلاف ہوگی پس اس روایت میں اضطراب ہے جس کی وجہ سے قابل استدلال نہیں کیونکہ زہری کی روایت کا مفہوم اسحاق بن عبداللہ اور عاصم بن عمر اور ابوالابیض کی روایت سے مختلف ہے جبکہ سب حضرت انس (رض) سے روایت کرتے ہیں۔
نماز عصر کی تاخیر کے قائلین کا مؤقف :
نماز عصر کو اصفرار آفتاب سے پہلے پہلے مگر ذرا تاخیر سے پڑھا جائے یہ افضل ہے اس سلسلہ کی روایات و آثار بمع جوابات اشکال پیش کئے جائیں گے۔