١١٥٧: سعید بن جبیر نے ابن عباس (رض) سے نقل کیا کہ وہ فرمانے لگے : { وَلَقَدْ آتَیْنَاکَ سَبْعًا مِّنَ الْمَثَانِیْ } [الحجر : ٧] سے مراد سورة فاتحہ ہے پھر انھوں نے بسم اللہ پڑھ کر بتلایا کہ یہ سورة فاتحہ کی ساتویں (پہلی) آیت ہے۔ ان سے دوسرے علماء نے اختلاف کرتے ہوئے کہا کہ نماز میں اس کے بلند آواز میں پڑھنے کا ثبوت اس سے نہیں ملتا پھر ان میں سے بعض نے یہ کہا کہ آہستہ پڑھے اور بعض نے یہ کہا کہ اس کو سر و جہر بالکل نہ پڑھے اس سلسلے میں انھوں نے پہلے قول والوں کے خلاف اس روایت کو پیش کیا۔
تخریج : عبدالرزاق ٢؍٩٠۔
حاصل روایات : ان روایات سے معلوم ہوتا ہے کہ بسم اللہ کو سورة فاتحہ کی ابتداء اور بعد والی سورت کی ابتداء میں جہری میں جہراً اور سری میں سراً پڑھا جائے گا یہ فاتحہ کا جز ہے جب فاتحہ کو جہراً پڑھا جاتا ہے تو یہ بھی جہراً ہوئی بقول ابن عباس سبع من المثانی کا مصداق سورة فاتحہ ہے بسم اللہ کے بغیر اس کی سات آیات نہیں بنتیں۔
مؤقف فریق ثانی :
بسم اللہ کو جہراً نہ پڑھا جائے بلکہ سراً پڑھا جائے بلکہ بعض تو سر بھی نہ پڑھنے کے قائل ہوتے انھوں نے مندرجہ ذیل روایات سے استدلال کیا ہے۔