١١٧٢: ابوالجوزاء نے حضرت عائشہ (رض) سے روایت نقل کی ہے کہ جناب رسول اللہ (صلی اللہ علیہ وآلہ وسلم) تکبیر سے نماز شروع فرماتے اور قراءت کو الحمدللہ سے شروع فرماتے اور سلام سے نماز کو ختم کرتے۔ امام طحاوی (رح) فرماتے ہیں جب متواتر روایات جناب رسول اللہ (صلی اللہ علیہ وآلہ وسلم) اور حضرت ابوبکر و عثمان (رض) سے نقل ہو کر آئی ہیں جن کا گزشتہ سطور میں ہم ذکر کرچکے جن میں سے بعض روایات میں یہ ہے کہ وہ قراءت کو الحمد للہ ربّ العالمین سے شروع کرتے تھے ان روایات میں ایسی کوئی دلیل نہیں ‘ وہ بسم اللہ کو پہلے یا بعد پڑھتے تھے کیونکہ ان کے ہاں قراءت سے قراءت قرآن مراد ہے ‘ اس میں یہ احتمال ہوا کہ وہ بسم اللہ کو ذکر شمار کرتے تھے ‘ قرآنِ مجید کا حصہ شمار نہ کرتے تھے جیسے سبحانک اللہ اور وہ جو دوسری دعائیں پہلے پڑھ کر پھر الحمد شریف کا آغاز کیا جاتعا ہے۔ دوسری روایات میں یہ ہے کہ وہ بسم اللہ الرحمن الرحیم کو جہراً نہ پڑھتے تھے ‘ اس سے یہ ثابت ہوگیا کہ وہ اس کو آہستہ پڑھتے تھے اگر یہ بات نہ مانی جائے تو ان کی روایات میں جہر کی نفی کرنے کا کوئی مطلب نہیں بن سکتا ان آثار کو صحیح قرار دینے کا تقاضا بسم اللہ کے جہر کو چھوڑنا ہے اور اس کو آہستہ پڑھنا ہے۔
تخریج : مسلم فی الصلاۃ ٢٤٠‘ ابو داؤد فی الصلاۃ باب ١٢٢‘ نمبر ٧٨٣‘ ابن ماجہ فی الاقامہ نمبر ٨٦٩‘ مسند احمد ٦؍٣١؍١٩٤۔
حاصل روایات : بسم اللہ کو جہراً پڑھنا درست نہیں بلکہ سراً پڑھا جائے گا بعض روایات میں قراءت کے الحمدللہ سے شروع کرنے کا تذکرہ ہے اس کا مطلب یہ نہیں کہ بسم اللہ پڑھی ہی نہ جاتی تھی بلکہ مطلب یہ ہے کہ سبحانک اللہ وغیرہ استفتاح کی دعاؤں کی طرح یہ بھی ذکر و دعا ہے اس کو بطور دعا کے سراً تو پڑھا جاتا تھا مگر قراءت میں شامل کر کے نہ پڑھا جاتا تھا معلوم ہوا کہ ان کے ہاں یہ فاتحہ کا جز بھی نہیں اور اس کا جہراً پڑھنا بھی لازم نہیں۔
تو اب اس سے یہ ثابت ہوگیا کہ بسم اللہ سراً پڑھی جائے گی جیسا کہ حضور (صلی اللہ علیہ وآلہ وسلم) اور ابوبکر و عمرو عثمان (رض) کے عمل سے ثابت ہے اگر یہ مطلب تسلیم نہ کیا جائے تو جہر کی نفی کا کوئی مطلب نہ بن سکے گا اور یہ بات حضرت علی (رض) کے ہاں بھی مسلم ہے جیسا کہ اس روایت میں وارد ہے۔